Ирак, Сирийн хойд этгээдийн нутгуудыг хяналтдаа авч, эзэмшил нутгийнхаа хил заагийг тэлэхийг эрмэлзэж буй лалын хэт даврагч “Лалын улс” бүлэглэлд хулгайлагдсан насанд хүрээгүй охид боолын зах дээр худалдаалагдаж байгаа талаар  НҮБ-ын Зөрчил мөргөлдөөн дэх бэлгийн хүчирхийллийн асуудлаарх тусгай төлөөлөгч Зайнаб Бангура мэдэгдлээ. 

Түүний хэлж буйгаар охид ердөө хайрцаг тамхины үнээр зарагдах тохиолдол байдаг гэнэ. НҮБ-ын тусгай төлөөлөгч З.Бангура энэ оны дөрөвдүгээр сард Ирак, Сирийн нутгуудад ажлын айлчлал хийснийхээ дараа хэт даврагч бүлэглэлийн заналхийлэл, бэлгийн хүчирхийллийн асуудалд анхаарлаа хандуулан ажиллах болсон юм. Тэрбээр айлчлалынхаа хүрээнд Лалын улс бүлэглэлийн хяналтдаа авсан бүс нутгаас зугтааж ирсэн охид, бүсгүйчүүдтэй ярилцаж, орон нутгийн шашны болон улс төрийн удирдагчидтай уулзаж, Турк, Ливан, Йорданд амьдарч буй дүрвэгсэдийн байр байдлыг сонсоод иржээ. 

Лалын улс бүлэглэл жижиг тосгон, хотууд руу довтолж, олзолсон эмэгтэйчүүдээ худалдахын тулд боолын захыг ажиллуулдаг бөгөөд эдүгээг хүртэл хэчнээн бүсгүйчүүд бэлгийн боолчлолд өртсөнийг тооцоолох боломжгүй аж. Эмэгтэйчүүдийг хайрцаг тамхинаас эхлээд хэдэн зуун ам.доллар, мөн хэдэн мянган ам.доллараар зарагддаг байна. Тэдгээр бүсгүйчүүдийн ихэнх нь Иракийн хойд этгээдийн Курдын цөөнхийн язидис шашинтнууд байдаг гэнэ. “Бүсгүйчүүдийн зарим нь нэг өрөөнд түгжигдэж, хүчээр нүцгэлүүлэх бөгөөд давчуу байшинд  100 гаруй хүн цугларч, охидыг эрчүүдийн өмнө зогсоон үнэ хаялцуулан худалдаалдаг”  хэмээн З.Бангура хэвлэлийнхэнд ярьжээ. Хэт даврагчид олзолсон бүсгүйчүүдээ сорчлон хамгийн царайлагийг нь  өөрсдийн хар зах дээр аваачиж эхлээд зэвсэгт бүлэглэлийн толгойлогчдод санал болгоод, дараа нь цэргүүдэд худалддаг гэнэ.