Сүүлийн хориод жилд гадаадаас Монголд сэм орж ирээд юу дуртайгаа хийж, хүссэнээ олж аваад хил даван алга болдог гэмт этгээд цөөнгүй бүртгэгдсэн байдаг. Мөн тэдгээр хүмүүсийн зарим нь Монголоос гарч явж чадалгүй учир битүүлгээр амиа алдсан нь бий. Хоёр жил гаруйн өмнө Афганистанаас ирсэн гэх нэгэн хазар эр ОХУ-аар дамжин манай нийслэл хотод орж ирсэн байлаа. Улс гүрэн дамнасан томоохон бизнес эрхлэх, сонирхсон  чиглэлээрээ судалгаа хийх нэрээр мань эр улс төрийн хүрээний зарим томчуудтай уулзаж байжээ. Гэвч түүний дансанд их хэмжээний мөнгө байгааг мэдсэн этгээд алсан уу, эсвэл Орост байхдаа  өвдсөн шүдээ ломбодуулснаас болсон уу, нийслэлийн төв хэсэг дэх нэгэн зочид буудалд амиа алдсан байсан гэдэг. Хазарууд ер нь Монгол гаралтай гэдгээрээ бахархан манай улс руу ирэх нь олширч байгаа бөгөөд тэдний халаасыг сэгсэрч хаях бүлэглэл байхыг үгүйсгэж боломгүй байгаа юм. Гэвч тэрхүү хазар эрийн үхлийн шалтгаан, хэн, хэрхэн  хөнөөсөн нь одоо болтол учир битүүлэг ажээ.

Тэгвэл үүнтэй төсөөтэй гэмээр бас нэг хэрэг гарсан байна. Тагнуулын ерөнхий газрын Сөрөх тагнуулын газрын дарга асан Д.Цогтбаатарыг холбогдуулан шалгаж байсан Герман улсын харъяат М.Л.Клойбер гэгч нь арваад жилийн өмнө Монголд ирээд сураггүй болсон байжээ. Энэ тухай зарим хэвлэлүүд саяхнаас зах зухаас нь дэлгэж байна. Д.Цогтбаатар нь одоо улсын нууц задруулсан хэргээр дөрвөн жилийн ял сонсон шоронд сууж байгаа. Түүнийг анх М.Л.Клойберын хамтран амьдрагч Ё.Гантуяагаас их хэмжээний мөнгө залилж авсан хэргээр шалгаад хэргийг хэрэгсэхгүй болгосон гэдэг. Гэтэл М.Л.Клойберын цогцос “Голомт” хотхоноос олдсон юмсанж. Хэн түүнийг хорооосон нь тодорхой бус. Ямартай ч тэнд байр өлсөлж сууж байгаад нас барсан тухай мэдээлэл цагдаагийн байгууллагад ирсэн байжээ. Харин Д.Цогтбаатар саяхан өөрийгөө ямар ч үндэслэлгүйгээр хилс хэрэгт яллагдсан хэмээн НҮБ-ын дэргэдэх Хүний эрхийн байгууллагад хандах болсноо мэдэгдээд байгаа юм. Сөрөх тагнуулын газрын даргаар ажиллаж байхдаа Д.Цогтбаатар нь М.Л.Клойберын мөрөөр мөшгөж, ямар нэг сэжүүр олсон байхыг   үгүйсгэх аргагүй болов уу. М.Л.Клойбер нь ихээхэн учир битүүлэг нэгэн байсан бөгөөд Монголд ирээд жил гаруйн дараа “сураггүй болох” хүртлээ байнга гадаад улс орнууд руу яваад ирдэг байсан тухай түүний хамтран амьдрагч нь цагдаа нарт хэлдэг байжээ. М.Л.Клойбер манай улсад тагнуулын ажлаар ирсэн байв уу?!  

Б.Баяр 

Эх сурвалж: Tumen.mn