Улсын Ерөнхий прокуророос УИХ-ын нэр бүхий дөрвөн гишүүний бүрэн эрхийг түдгэлзүүлэн шалгах хүсэлтийг УИХ-ын даргад хүргүүлсэн. Үүний дагуу Халдашгүй байдлын дэд хороо хуралдсан ч дэд хорооны дарга Н.Энхболд ирээгүй гэх шалтгаанаар ямар нэгэн шийдэлд хүрээгүй. Тиймээс өнөөдөр үргэлжлүүлэн хэлэлцэхээр болсон юм. Үүнтэй холбоотойгоор гэмт хэрэгт холбогдож, яллагдагчаар татагдсан бусад гишүүдийг оруулж ирэхгүй байгаад шүүмжлэлтэй хандаж буй. Тухайлбал, яллагдагчаар татагдаад буй УИХ-ын гишүүн А.Адьяасүрэн, Б.Бэйсэн нарыг нэрийг яагаад оруулж ирэхгүй байгааг сонирхож байгаа юм.

Тэгвэл үүнтэй холбоотойгоор Улсын Ерөнхий прокурор Б.Жаргалсайхан болон А.Адьяасүрэн нарын хэлсэн эсрэг тэсрэг байр суурийг хүргэе.

Б.Жаргалсайхан: УИХ-ын гишүүн А.Адьяасүрэнд мөрдөн шалгах ажиллагаа үргэлжилж байна

/Улсын ерөнхий прокурор/: -Бусад нотлох баримтаар нотлогдсон тохиолдолд заавал гишүүний бүрэн эрхийг түдгэлзүүлэхгүйгээр шийдэх бүрэн боломжтой. Тиймээс бусад гишүүд дээр мөрдөх байгууллагын санал орж ирээгүй. УИХ-ын гишүүн А.Адьяасүрэн, Б.Бейсэн нарыг мөрдөн шалгах ажиллагаа үргэлжилж байна.

А.Адьяасүрэн: Намайг хууль хяналтын байгууллагаас дуудаж, шалгаагүй

/УИХ-ын гишүүн/: -Хууль шүүхийн өмнө хүн бүр тэгш эрхтэй. УИХ, Засгийн газрын гишүүн байна уу ялгаагүй ямар нэгэн асуудалд холбогдсон бол шударгаар шалгуулах ёстой. Гэхдээ хамгийн гол нь ийм асуудалд хэн нэгнийг улстөржүүлж, хэлмэгдүүлэх вий гэж санаа зовж байгаа. Намайг хууль хяналтын байгууллагаас дуудаж, шалгаагүй. Угаасаа ч би хийсэн гэмгүй.