Монгол бөхийн бяр чадал, ур ухаан, тэсвэр хатуужлыг хэн хүний зүрх сэтгэлд хоногштол харуулсан“Гарьд магнай кино”-г мэдэхгүй хүн үгүй биз. Монгол хүн бүрийн хэзээ ч уйдахгүйгээр таашаан үздэг энэ сайхан киног Равсал панзын дүр улам ч сонирхолтой болгосон гэдэг. Кинон дээрх баян Равсал амьдрал дээр “Нарантуул II” захын хойхно гэр хороололд шавар байшинд амьдардаг юм билээ.
Монгол Улсын гавьяат жүжигчин Бадамраагийн Магсаржав хэмээх энэ эрхэм хүнийг Төрийн орон сууцны корпорацийнхан баяр наадмын өмнөхөн байртай болгоно хэмээн амлаж, сүр дуулиантайхан аян эхлүүлж байсан. Эргэн сануулахад, ТОСК-ийн хамт олон улсын их баяр наадмыг угтаж нийгмийг донсолгосон хүмүүнлэгийн аяныг санаачлан “Равсал Панз” нэрээрээ алдаршсан МУГЖ Б.Магсаржав гуайд Монголын кино урлагт хийсэн бүтээсэн хөдөлмөрийг нь үнэлж, орон сууц бэлэглэхээр болсон талаар мэдээлж байв. Гэхдээ төрийн мэдлийн орон сууцыг тэд дур мэдэн бэлэглэх эрхгүй тул хандивийн аян өрнүүлсэн гэдэг.
Зөвхөн ТОСК-ийн хүрээнд бус нийт ард иргэдийнхээ дунд энэхүү аяныг өрнүүлж, илүү олон хүн хамруулах зорилгоор сошиол медиагаар давалгаалсан Ice Bucket Challenge шиг ТОСК-ийн Ерөнхий захирал А.Гантулга анхны уриалгыг эхлүүлж, нэг сарынхаа цалинг, харин тус байгууллагын ажилтан албан хаагчид нэг өдрийнхөө цалинг хандивласан аж. Улмаар А.Гантулга захирал БСШУ-ны сайд Л.Гантөмөр, Нийслэлийн засаг дарга бөгөөд Улаанбаатар хотын захирагч Э.Бат-Үүл болон ҮББК-ийн ерөнхийлөгч Ц.Эрдэнэбат нарыг дэмжиж хандив өргөхийг уриалснаар уг аян үргэлжилжээ.
МУГЖ Б.Магсаржав гуайд шинэ байрных нь түлхүүрийг Улсын их баяр наадмаар гардуулж өгнө гэх мэдээлэл гарч байсан ч өнөөдрийг хүртэл таг чиг.
Төр засаг гавъяаг нь үнэлж шагнал өгсөн ч орон сууцанд дулаан, тохилог орчинд амьдрах боломж олголгүй насан өндөр болж яваа гавъяат маань хэзээ байртай болохыг таах аргагүй. Хэлсэндээ хүрч, амалсанаа биелүүлнэ гэдэг хүний чухал зан чанарын нэг. Тиймдээ ч энэ аяныг эхлүүлсэн “Тоск” Гантулга “Равсал Панз”-ыг байртай болгож чадах эсэхийг харах л үлдэж дээ.
Н.БАЯР medee.mn
