Засгийн газрын бүтцийг батлахтай зэрэгцээд өчигдөр оройноос шинэ сайдуудад хэн хэний нэр сойгдох бол гэсэн таамаг яриа иргэдийн дунд улам хүчтэй өрнөж байна. Монголчууд наадам болгоныхоо өмнө бөх, морио шинждэг шиг л юм болцгоох аж. Төр засагт сайн хүн гарч ажиллавал түмэн олонд тустай болохоор арга ч үгүй биз. Гэвч их санасан газартаа есөн шөнө хоосон хонов гэгч болж мэдэх бололтой. Шадар сайдад МАН-аас У.Хүрэлсүхийн нэр яригдаж буй нь учрыг мэдэх зарим хүмүүсийн дургүйцлийг төрүүлж байна. Мөн Д.Оюунхорол гишүүнийг Боловсрол,соёл, шинжлэх ухааны сайдад зүтгүүлэх сураг гарлаа. Гэхдээ тус яамыг АН мэдэх болсон. Тэгээд ч одоо байгаа сайд Л.Гантөмөр нь хэвээр үлдэж магадгүй. Харин МАН-ын өөр нэг эх сурвалж Д.Оюунхоролыг Байгаль орчин, ногоон хөгжил, аялал жуулчлалын сайдаар томилогдоно гэж байна. Үнэн байж болох юм. Гэвч МАН-аас уг нь давхар  дээлтэй сайд байхын эсрэг санал гарч байсан. Энэ байр суурин дээрээ хатуу зогсоно хэмээн удирдлагууд нь өчигдөр чуулганы танхимд бас хэлж байна лээ. Хэрвээ Д.Оюунхорол тус яамыг толгойлвол давхар дээлтэй “намирч” таарна. Ингээд МАН-ын өнөөх лут зарчим зөрчигдөнө. Нөгөөтэйгүүр, түүний хувийн “Отгонтэнгэр” их сургууль руу засгийн “хаялга” бөөндөж очих магадлал өндөр болно. Тэгээд ч энэ эмэгтэй олон жил улс төрийн тогоонд тийчлэхдээ элдэв хардлага, сэжиг бүхий мөнгөний асуудалд олонтоо нэр холбогдсон нэгэн. Ийм хүнээр толгойлуулсан яам боловсролын шинэчлэлд олигтой юм хийхгүй болов уу гэж таамаглах хүн цөөнгүй.

Б.Баяр

Tumen.mn