Жил бүрийн хавар "Хонхны баяр"-аа их, дээд сургуулийн оюутнууд болон ЕБС-ийг төгсөгчид тэмдэглэдэг. Өдгөө урин дулаан цаг хэдийннээ айлчилсан болохоор хонхны баярын ид сезон эхэлж байна.  Төгсөгчид баяраараа хонхоороо гоёдог басхүү үүнийхээ хажуугаар өөр нэгэн гоётой болоод удаж буй гэхэд хилсдэхгүй.

Архи, шампансик хоёргүйгээр баяраа төсөөлөхөө больсон гэдэг. Нийгэмд хөл тавин орох гэж буйгаа архиар тунхагладаг нь хаанахын ёс вэ? 

Дээх нь үед төгсөлтийн баяраараа "шилтэй ундаа" найзуудтайгаа хувааж уудаг байсан гэж танил ах минь хуучилж байсан удаатай. Тэгвэл үүнийг одоогийн хүүхдүүд сонсвол "шоолох" биз хэмээсэн. 

Хүүхдээ бусдаасаа дутаачих вий гэсэн эцэг, эхийн шаналалаас болж байгаа хэдийгээ тавиад туучихдаг нь нууц биш. Гэтэл хонхны баярын үргэлжлэл нэртэй "Зугаалга" энэ бол жинхэнэ архидалт болж хувирдаг гэдгийг хаана хаанаа мэддэг. Гэвч үүнийг хориглож зогсоож байгаа зүйл алга. 

Өдгөө нийслэлийн хотын хэмжээнд энэ хичээлийн жилд ЕБС-ийн 213 сургуулийн нийт 26102 сурагч, 94 их, дээд сургууль, коллеж, мэргэжлийн сургалт үйлдвэрлэлийн төвийн нийт 22000 орчим оюутан төгсөнө гэдгийг Монголын оюутны холбоо болон Нийслэлийн Боловсролын газраас мэдээлсэн.

Тэгвэл эдгээр хүүхдүүд болон оюутнуудыг Улаанбаатар хотын цагдаагийн газар, Монголын оюутны холбоо,Сурагчдын холбоо, Нийслэлийн Боловсролын газар хамтран оюутан сурагчдад хандаж төгсөлтийн хонхны баярыг "Эрдмийн баяр" болгон тэмдэглэн өнгөрүүлэх талаар "Уриалга" гаргаад байгаа билээ. Уриалгыг хүлээж авах ухамсартай оюутнууд, сурагчид олон бий. 

Энд "гай газар доороос, гахай модон дотроос" гэдэг үгийг сөхье. Учир нь архи уусан хүн оюун ухаанаа хянах чадваргүй болдог. Хонхны баяраа тэмдэглээд маргааш нь "гэмт хэрэгтэн" болж, баярынхаа өдөр хорвоог орхисон  тохиодол цөөнгүй бий. Эл бүгдээс сэрэмжлүүлэх үүднээс хэдэн баримтыг дурдья.

Одоогоос есөн жилийн"......." дээд сургуулийн Аялал жуулчлалын ангийн оюутнууд төгсөлтийн баяраа тэмдэглэн зугаалгаар гурав хоног явах үед нэг оюутан амь насаа алдсан хэрэг гарсан юм. Зугаалгаар явсан оюутнуудын ярьснаар амралтанд очсон гурав дахь өдөр нь хохирогч болох 22 настай Н-ийн цогцсыг холгүйхэн хадны хажууд хэвтэж байхыг олсон гэдэг. Хоёр хоног хөл толгойгүй архидсан оюутнууд гурав дахь өдөр архи нь ч дуусч эхнээсээ ухаан орж эхэлсэн бөгөөд энэ үед Н байхгүй байгааг мэдсэн бөгөөд нийтээрээ хайх үед түүний цогцсыг олов. Хохирогч гадны ямар ч шарх сорвигүйгээр учир битүүлгээр нас барсан байсан ба түүнийг золгүйгээр амиа алдсан гэж эрүү үүсгэлгүй хэргийг хаасан. /тус сургуулийн нэрийг нууцлав./

Мөн төгсөлтийн баяр нь болоход хэдхэн хоног дутуу байхад доод курсын оюутнуудаас "ах нь удахгүй төгслөө архи авч өгөх үү" хэмээн аархалаас болж гэмгүй оюутны аминд хүрсэн. Одоогоос 4 жилийн өмнө болсон уг хэргийн талаар тухайн үеийн эх сурвалжууд өөр өөр мэдээлэл өгдөг. Дуугүй даруу нэгнийг "догшин" араатан болгодог архи гэгчийн буруугаас боллоо гэж эрүүл болсон хойноо өөрийгөө зүхэж суусан тэр залуу өнөөдрийг хүртэл төмөр торны цаана сууж байгаа. Энэ мэтчлэн хонхны баяраараа гэмт хэрэгтэн, хохирогч болж гэр бүлээ, нулимс, харуусал дунд үлдээсэн хар мөрийг бүү үлдээгээрэй гэсэн үүднээс энд сийрүүллээ. 

Гэмт хэрэг зөрчилгүй, архи согтууруулах ундаагүйгээр "Хонхны баяраа" тэмдэглэнэ биз ээ. 

Х.Даваа

Эх сурвалж: www.dorgio.mn