Орос, Монголын хамтарсан Уулын баяжуулах “Эрдэнэт” үйлдвэрийн “хар данс”-нд орсон 105 аж ахуйн нэгжийн нэрсийг тус үйлдвэрээс өнгөрсөн онд зарласан. Өөрөөр хэлбэл, үйлдвэрт их хэмжээний өртэй, “Гэрээнд заасан үүргээ биелүүлээгүй” гэсэн үндэслэлээр эдгээр аж ахуйн нэгжийн нэрсийг олон нийтэд сонордуулж “Дахиж хамтарч ажиллахгүй” гэдгээ ч мэдэгдсэн юм. “Эрдэнэт” үйлдвэрийн Ерөнхий захирал Ц.Даваацэрэн өнгөрсөн долоо хоногт сэтгүүлчидтэй уулзах үеэрээ “Манай Өр барагдуулах албаныхан энэ чиглэлээр ажиллаж байна.

 Одоогийн байдлаар, 48 компаниас 11,7 тэрбум төгрөгийн өр авлагыг барагдуулсан” гэв. Үүнээс гадна “Эрдэнэт” үйлдвэрт хэрэгтэй, хэрэггүй шахааны бараанууд их байна. Үүгээр бараг музей байгуулсан ч болно” гэх яриа багагүй дуулиан дагуулж байсан. Ц.Даваацэрэн захирал энэ талаар “Үйлдвэрийн агуулахад буй бараануудыг нэлээд цэгцэлсэн. Харин үйлдвэрт огт ашиглагдахгүй найм орчим тэрбум төгрөгийн бараанд нээлттэй худалдаа зарлаж, хоёр тэрбум гаруй төгрөгийн бараа, бүтээгдэхүүнүүдийг аж ахуйн нэгжүүдэд худалдлаа. Үүнээс гадна огт ашиглах боломжгүй хоёр тэрбум төгрөгийн барааг устгасан” гэлээ.