МАХН-ын дарга Н.Энхбаярыг Солонгос руугаа  оргоод явчихлаа гэх мэдээлэл өнгөрсөн долоо хоногийн нэг онцлох сэдэв болж байлаа. Гэхдээ тэр оргоогүй. Прокурор болон АТГ-аас албан ёсны зөвшөөрөл авч Солонгост зургаан сар орчим эмчилгээгээ үргэлжүүлэхээр явжээ. Харин түүнд холбогдох хэргийн талаар эх сурвалжууд хэлэхдээ худалдан авсан намын байрных нь төлбөрт 1.5 сая ам.доллар нэхэмжилсэн Америкийн иргэн А.Генсбургийн гомдолоор шалгах болсон гэж байгаа. Мөн өөр хэрэг ч цагдаад бүртгэгджээ.

Н.Энбаярын дүү Н.Энхтуяа, Байгаль орчин, ногоон хөгжлийн дэд сайд асан Б.Тулгын ах Б.Хуяг нарыг  интерполоор эрэн сурвалжилж байгаа. Н.Энхтуяагийнх нь “Эскон” компанитай холбоотой хэд хэдэн хэргийн сэжүүр цухалзаад  удаж буй аж. “Улаанбаатар” телевизийн 20 хувийг мөн Н.Энхбаяр хууль бусаар эзэмшиж байсан гэдэг.  Одоо энэхүү хувьцааны 20 хувь Н.Энхбаярын хамаатнуудын нэр дээр байгаа бололтой. Түүнчлэн  BLNE SKY  төвийг Н.Энхбаяртай холбон тайлбарладаг. Гэхдээ Н.Энхбаярыг шалгаж  эхэлсэн 2012 оны үед тус төвийг Б.Ариунаа гэдэг эмэгтэйн нэр дээр шилжүүлсэн байв. Ер нь энэ мэт учир битүүлэг зүйлс Н.Энхбаярт нэлээд олон тул АТГ-ынхан үргэлжлүүлэн шалгаж байгаа ажээ.

Б.Баяр

Эх сурвалж: Tumen.mn