Монгол Улсын Ерөнхийлөгч асан Х.Баттулга өчигдөр хилээр гарсан тухайд ХҮН намын хуульч Д.Үүрцайх мэдээлэл хийлээ.
Тэрбээр "Х.Баттулга өмнө нь АТГ-т мэдүүлэг өгөхдөө энэ сарын 18-ны өдөр гадагшаа явж, эмчилгээ хийлгэх шаардлага гэсэн. Ерөнхийлөгч асан Х.Баттулга одоо тодорхой хэрэгт яллагдагчаар татагдан, шалгагдаж байгаа. Үүнтэй холбогдуулан таслан сэргийлэх арга хэмжээ авсан. Эрүүгийн хэрэг хянан шийдвэрлэх тухай хуульд заасан олон янзын олон шатлалтай арга хэмжээнээс хэргийн мөрдөгч болон прокурор шүүхэд хандахгүйгээр авч болдог хамгийн бага буюу хувийн баталгаа гаргах гэдэг таслан сэргийлэх арга хэмжээ авжээ.
Хэрэв Х.Баттулга эмчилгээнээсээ эргэж ирэхгүй бол АТГ-ын мөрдөгч, Ерөнхий прокурор хариуцлага хүлээх ёстой.
Мөн Х.Баттулга зайлшгүй гадаадад эмчлүүлэх шаардлагатай байсан уу. Өөрөөр хэлбэл Монгол Улсад эмчлэх боломжгүй өвчний жагсаалтад багтсан уу гэдгийг тодруулах хэрэгтэй. Хэрэг хянан шийдвэрлэх ажиллагаанаас оргон зайлсан нөхцөл байдал тогтоогдсон бол хариуцлагын асуудал яригдах ёстой" гэв.
