2016 онд МАН бүх шатны сонгуульд ялалт байгуулж, М.Энхболд ба түүний нөхөд дарга хэмээх сэтэр зүүж, даамал ноён болж явсан билээ. Гэвч 60 тэрбум төгрөгөөр төрийн албыг наймаалцах гэсэн хэмээх шуугиан 2017 оны Ерөнхийлөгчийн сонгуулиар эрчийг авч, эрх баригч МАН-ын дотор нь 2 хуваасан. Үүний үр хөврөл явсаар У.Хүрэлсүх намын дарга, Ерөнхий сайд болж М.Энхболдын талынхан буюу 60 тэрбумын нөхдөөс намаа цэвэрлэх ажлыг эхлүүлсэн гэдэг. Үнэн хэрэгтээ 60 тэрбумынхан МАН-аас явж, төрийн албанаас чөлөөлөгдсөн үү гэдгийг өнөөдөр асуух цаг болжээ.
Тухайлбал Нийслэлийн засаг дарга С.Амарсайхан хэдхэн хоногийн өмнө нэг том тушаалыг гаргасан байдаг. Энэ нь Нийслэлийн газрын албаны даргаар ажиллаж байсан Э.Болорчулууныг чөлөөлж, оронд нь А.Энхманлайг Нийслэлийн газрын албаны даргаар томилсон билээ.
С.Амарсайхан дарга шударга ёс ярьж, 60 тэрбумын гэх нөхдийг хотын өндөр албан тушаалаас чөлөөлж байгаа хэмээх дүр төрхийг өөртөө бий болгож яваа нэгэн. Гэтэл түүний чөлөөлж, бас томилж байгаа хүмүүс нь 60 тэрбумын гэх Ц.Сандуй гэгчтэй олон сэжимээр холбогдож байна.
Тухайлбал Ц.Сандуй нь Нийслэлийн газрын албаны даргаар ажиллаж байхдаа Э.Болорчулуун, А.Энхманлай нарыг удирдан чиглүүлж явсан нэгэн. Тодруулах юм бол Ц.Сандуйг Нийслэлийн газрын албаны дарга байхад Э.Болорчулуун нь Сонгинохайрхан дүүргийн газрын албаны дарга. Харин А.Энхманлай нь Баянзүрх дүүргийн газрын албаны дарга байжээ. Үүнээс харах юм бол ажлаа өгсөн Э.Болорчулуун, ажил авсан А.Энхманлай нар Ц.Сандуйгийн удирдлага дор ажиллаж, түүнтэй хамтран шийдвэр гаргаж явсан хүмүүс болж байна.
Он цаг хугацааг ухараагаад санах юм бол Ц.Сандуй нь 2003- 2007 оны хооронд Нийслэлийн газрын албаны кадстрын хэлтсийн даргаар ажиллаж байжээ. Ийнхүү хэлтэс толгойлж байхдаа ажилд авч, арга ухаанаа зааж сургасан хүмүүсийн нэг нь А.Энхманлай юм байна. А.Энхманлай нь 2003-2004 оны хооронд Нийслэлийн газрын албаны кадстрын хэлтэст газар зохион байгуулагчаар ажилд орж байсан нэгэн.Түүнийг ажилд авсан хүн нь Ц.Сандуй. Тухайн үед Нийслэлийн газрын албанд ажиллаж байсан хүмүүсийн дурсамжаар Ц.Сандуй нь гадагшаа ажил, сургалт зэрэгт явахдаа А.Энхманлайд кадстрын албаны даргын ажлыг орлох эрхийг өгдөг байсан тухай явган яриа байдаг юм байна.
С.Амарсайхан дарга сүрхий шийдвэр гаргаж, бас болоогүй Ц.Сандуйгийн гарын хүн хэмээгдэх Э.Болорчулууныг чөлөөлсөн гэх дүр зургийн цаана дахиад л Ц.Сандуйтай учиг холбоостой А.Энхманлайг даргаар томилчихсон нь ямар учиртай вэ? Аль эсвэл бас л хөшигний цаана Ц.Сандуй ба С.Амарсайхан нарын хооронд нууц тохиролцоо хийгдэж, Нийслэлийн газрын албаны даргын албан тушаалыг Ц.Сандуйд найр тавьж өгсөн үйл явдал болчихов уу хэмээн МАН-ын зарим улс төрчид хардаж буйгаа явган яриа болгон явуулж эхэлсэн сурагтай.
Ингэж хардах болсон нэг шалтгаан нь А.Энхманлай нь Төрийн албанд томилогдох, ингэхдээ шууд дарга албан тушаалд суух боломж хомс гэдгээс үүдэлтэй гэнэ. Тодруулах юм бол А.Энхманлай нь 2013 онд 1 жилийн хугацаатай төрийн албанаас чөлөө авсан. Мөн 2014 онд төрийн албанаас мөн л 1 жилийн хугацаатай чөлөө авч байжээ. Энэ бүхэн нь төрийн албаны тухай хуулиар бол төрийн албаны нөөцийн жагсаалтаас хасагдах шалтгаан болдог байна.
Газар зохион байгуулалт, геодези зураг зүйн газрын дарга Ц.Ганхүүгийн Нийслэлийн засаг дарга бөгөөд Улаанбаатар хотын захирагч С.Амарсайханд хаягласан албан бичгээс харагдаж байгаа юм.
Энэхүү албан бичигт дурдсан нэг хачирхалтай зүйл бол Нийслэлийн газрын албаны даргаар ажиллаж байсан Э.Болорчулууны ажлыг Газар зохион байгуулалт, геодези зураг зүйн газраас хангалттай хэмээн үнэлж байсан байна. Ийм байхад л Нийслэлийн засаг дарга С.Амарсайхан шийдвэр гаргаж А.Энхманлайг Нийслэлийн газрын албаны даргаар томилов. Үүний цаана нэг талаасаа Ц.Сандуйгийн хүн гэгдэх Э.Болорчулуунаас салж байгаа мэт боловч нөгөө талдаа дахиад л Ц.Сандуйгийн хүн гэж болох А.Энхманлайг албан тушаалд тавьсанд Нийслэлийн төр захиргааны байгууллагынхан гайхаж хоцроод байгаа гэнэ.
Нийслэлийн засаг дарга С.Амарсайхан нь 60 тэрбумынхнаас хотыг цэвэрлэнэ. Төрийн албан тушаалыг 60 тэрбум төгрөгөөр наймаалцсан асуудал байх юм бол уучлахгүй хэмээн попордог. Гэтэл үг нь чанга, иргэдэд итгэл төрүүлэх мэт 60 тэрбумыг эсэргүүцдэг бол үйлдэл нь харин өнөөх 60 гэж өөрсдөө чичилдэг Ц.Сандуй нартайгаа гар барьж, түүнтэй ойр явсан хүмүүсийг ээлжүүлэн албан тушаалд томилж байгааг чухам юу гэж ойлгох вэ?
Үргэлжлэл бий....
