Өнгөрөгч 2020 оны УИХ-ын  ээлжит сонгуулиар АН-аас нэр дэвшихээр горилогчоос 100  сая төгрөгийн дэнчин тавьж байгааг “Хера Холдинг” группийн захирал Х.Ганхуяг АН-д 100 сая төгрөгийн дэнчингээ тушаасан 158 нөхрийн  нэрийг ил болгож байв. Нэр дэвшигчид 100 сая төгрөгөөс гадна аймаг, нийслэл, дүүрэгтээ дахин 200-400 сая төгрөг тушаахаар болсныг АН-ын ҮБХ-ны гишүүн Д.Мөнх-Эрдэнэ эсэргүүцэж байгаагаа ч мэдэгдэж байлаа.

Дэнчингийн маргаан өнөөдөр ч намдаагүй улам бүр ширүүсэж байна. Учир нь  АН-ын гишүүд дэнчин хэмээн өгсөн 100 сая төгрөгөө С.Эрдэнээс эргүүлэн нэхэмжлэхээ илэрхийлээд эхэлжээ. Тэд хэлэхдээ “Бидний өгсөн 100 сая төгрөг бол нам болон сонгууль, эргээд бидэнд зориулагдаагүй. Гагцхүү С.Эрдэнийн халаасанд орсон байх магадлалтай байна” хэмээлээ. Нөгөө талаар “биднээс дэнчин нэрээр хангалттай их мөнгө авсан ч намаа хоёр хувааж, эв нэгдлийг үл ханган ажиллаж байгаа нь С.Эрдэнийн хувийн ашиг сонирхол, өчүүхэн шуналын төлөөх ажиллагаа” гэдгийг ч онцолж байв. Мөн энэ их мөнгөний зарцуулсан тайлан энэ тэр гэх юм байхгүй. Дутуу дулимаг аргалсан зүйл байгаа нь улам их хардлага дагуулж байгааг ч дуулгаж байлаа. Хэрвээ дэнчин төлөгсөд С.Эрдэнээс бүгд мөнгөө нэхэмжилнэ гэвэл тэр дааж давашгүй их өрөнд унаж байна гэсэн үг.

Х.Ганхуягийн нэрийг нь ил болгож байсан 158 хүний 100 сая төгрөг гэхээр 15 тэрбум төгрөг лавтай болно. Сонгуульд амжилт үзүүлээгүйгээс харахад дэнчингийн 15 тэрбум төгрөг хаашаа оросон байх вэ гээд асуудал бий.  

Энэ байдлаас харахад Ардчилсан нам учраа олохгүй байсаар Ерөнхийлөгчийн сонгуульд орох нь тодорхой болов. Гэр дотроо учраа олоогүй хүмүүс сонгуульд амжилттай оролцоно гэдэг худлаа. Одоогийн байдлаар Ц.Элбэгдорж буюу С.Эрдэнийн талд хэсэг бүлэг нь нэгдэж, Х.Баттулга буюу О.Цогтгэрэл даргатай хэсэг бүлэг гээд хоёр хуваагдсан байдалтай байна. Хууль дүрмээр нь хөөгөөд үзэхээр аль аль бүлэг нь Ерөнхийлөгчийн сонгуульд нэр дэвшигчээ илгээх боломжтой юм. Энэ л хамгийн том аюул. Гэтэл нийслэлийн Ардчилсан намын даргаар Э.Бат-Үүл сонгогдож байгаа нь энэ нам цаашид явахад маш хүндрэлтэй болж байна. Ерөөсөө энэ намд цоо шинэ хүмүүс, цоо шинэ үзэл баримтлал хэрэгтэй болжээ. Гучин жил ардчилал нэрийг өмчлөн, зөвхөн өөрсдийгөө борлуулж амьдарсан хүмүүсээс салах цаг нь болжээ.

З.Шатар 

Түмэн.мн