Монголын Үйлдвэрчний Эвлэл хэмээх сайхан нэртэй “шантаажны” газар болоо юу даа хэмээх гаслан олон нийтийн цахим сүлжээгээр олон нийтийн дэмжлэг авч ундарсаар. 2016 оны төсвийн төсөл яг одоо УИХ-ын чуулган болон бүх Байнгын хороогоор хэлэлцэгдэж, эрчээрээ батлагдан явсаар байтал МҮЭ таг дуугуй гөлийсөөр байна. Уг нь олон нийтийн ойлголтоор сануулах, ажил хаях, жагсах цуглах, эрх баригчдаас шаардах, шахах тэмцлийн түмэн арга байсаар байтал үхсэн амьд нь мэдэгдэхгүй алга. Ажил олгогч эздийн холбоо хэмээх мөн л МҮЭ-тэй зуузай холбон хэвлэлийн хурал хийж, хаа явсан газраа хамтдаа “хатирсан” нөхөд байдаг ч мөн л таг чиг боллоо. Чимээгүй дуугүй байсаны хөлс үү эсвэл ажил олгогч эздэд зориулсан төсөл хөтөлбөр үү?
Юутай ч Хөдөлмөрийн яамнаас 210 сая төгрөг аваад сураг алдарчээ. Чухам ямар ажилд энэ их мөнгийг дээрх байгууллага зарцуулдгийг ажлын байраа алдаж буй төрийн жирийн албан хаагчид, цалингаа хасуулж буй иргэд мэдэхээсээ мэдэхгүй нь олон. Ирэх жилийн төсвийг хэлэлцэж байгаа энэ цаг үед “тэрслүү” УИХ-ын гишүүд “Тансаглалаа хасахгүй байна, Шилэн дансаа хөтлөхгүй байна, хэтэрхий их мөнгийг хэрэггүй зүйлд зарцуулж байна” хэмээн шүүмжлэхийн хажуугаар хэмнэх гамнахдаа биш хамгийн түрүүнд иргэд рүүгээ дайрч “Цалин хасах юм байна”, “Орон тоог цөөлөх юм байна” гэж анхааруулж сануулсаар удлаа. Үнэндээ УИХ-ын цөөнхийн хэдхэн гишүүн л МҮЭ болон Ажил олгогч эздийн холбооны ажлыг “хаалтын гэрээгүйгээр” хийж байна. Ахмад настны тэтгэвэр, халамжийн талаар 2012 оноос өмнө ам хуурайгүй давшилж олон нийтээс оноо авч байсан Ахмадын чөлөөт холбооны тэргүүн Г.Баасан гуай С.Эрдэнэ сайдын НХХЯ-аас сар бүрийн эхэнд 9.1 сая төгрөг авдаг нь Шилэн дансаар ил болж, хамгийн сүүлд 39 сая төгрөг авснаа Eagle TV-ээр хүлээн зөвшөөрч, үнэндээ л таг чиг байна. Улс төрийн “хаалтын гэрээ” хийж, жагсч цуглаж Засгийн газарт шахалт үзүүлэх идэвхитэй иргэдийн төлөөлөл ар араасаа амаа таглуулан мөнгө авсаар иргэдийн төлөө, цалин тэтгэвэр, ажлын байрны төлөө дуугарах хүнгүй боллоо. Өмнө нь эдэнтэй хэрхэн яаж учраа олохоо үе үеийн Засгийн газар мэддэггүй байсан юмуу, эсвэл өгсөн мөнгийг нь голоод байсан уу? Бүүр нэг бол МҮЭ, АЧХ, МАОЭХ-д огт мөнгө төгрөг өгдөггүй ёстой жинхэнэ зорилтот хэсэгт нь тэтгэвэр, халамж зэрэг нь очоод байдаг байсан болоод ч тэр үү жагсаал, цуглаан тасардаггүй байж дээ. Өнөөдөр тэгвэл байдал өөр болж Монголын төр “Шилэн” болжээ. Шилэн дансны мэдээллээр асар олон тооны Төрийн бус байгууллагууд хэрхэн төрөөс угжиж санхүүжиж байгааг олон нийт хангалттай хардаг боллоо. Магадгүй энэ цаг үед хамгийн ашигтай бизнес ТББ үүсгэх болоод байгааг хэн хүнгүй харж байна. Хотын дарга Э.Бат-Үүл хүртэл загварын агентлаг, мотоциклчдын төрийн бус байгууллагуудад их хэмжээний мөнгө тарааж байгааг мөн л Шилэн данс нотлоод харууллаа.
Монгол Улсын төрийн яамд хэдэн зуун саяар нь хэвлэл мэдээлэл, төсөл хөтөлбөр, хэрэгтэй хэрэггүй нь мэдэгдэхгүй олон тооны хурал, цуглаан, уулзалт, дайллага цайллагад мөнгийг хүүдий хүүдийгээр нь цацаж байгааг иргэн Б.Цогтгэрэл олон нийтэд ил болгон зарлаж, харин сайд нар хүний урдаас эгцэлж харж чадахгүй сэтгүүлчдээс зугтан алга болж байна.
Уг нь бол хэрэггүй зардлаа танаж “Мөнгөн бороо”-гоо больчихвол, энэ олон зуун төрийн бус байгууллага, холбоод, эвлэлүүдэд “хаалтын гэрээ”- ний мөнгө өгч угжихаа зогсоочихвол төрийн жирийн албан хаагчид ажилтай, ажлын байртайгаа үлдэж, байр орон сууцны, автомашин, гар утасны лизингтэй хүмүүс цалингаа хугаслан яаж ийгээд л амьдарсаар байх болно.
МҮЭ-ийн хамгаалахгүй байгаа эдгээр ажлын байруудыг энэ чигт нь “тавиад туувал” тэд зээлээ хэрхэн яаж төлөх вэ ?Цалингийн болон бусад зээл олгосон банкууд нь үй олон найдваргүй зээлдэгчидтэй болж асар хурдан дампуурах болно гэдгийг эрхэм Сангийн сайд, Ерөнхий сайд, эрх баригч АН- ынхан мэддэг баймаар юм.
Уг нь бид чинь 2012 онд “Хүн шиг амьдарч улс шиг хөгжих” сонголт хийсэн болохоос өнөөдөр хотын дарга, Монгол Улсын баатар Э.Бат-Үүлийн “Грек шиг болно” гэх хатуу үгийг дуулах гэж сонгоогүйсэн.
Ажлын байраа алдмааргүй байна
Хүн шиг амьдармаар байна
Грек шиг болмооргүй байна
Улс шиг хөгжмөөр байна.
