ХХААХҮ-ийн сайд асан Т.Бадамжунайг эрх мэдэл, албан тушаалын байдлаа урвуулан ашиглах, хахууль өгөх, мөнгө угаах гэмт хэрэгт холбогдуулан яллагдагчаар татаж онгоцны буудлаас шууд хорих анги руу ачсанаас хойш 76 хоног өнгөрчээ.
Сануулахад, өнгөрсөн дөрөвдүгээр сарын 5-нд Хууль зүй, дотоод хэргийн сайд Ц.Нямбаатар, ЭЦА-ны дарга Т.Сүхболд, АТГ-ын дэд дарга Г.Азжаргал нар УИХ-ын гишүүн асан Т.Бадамжунайг Филиппин улсын Сэбү хотоос авчирсан юм.
Түүнийг авчирсныхаа дараа Хууль зүй, дотоод хэргийн сайд Х.Нямбаатар сэтгүүлч С.Гандөлд өгсөн ярилцлагадаа "Т.Бадамжунайг албадан авчирсан нэг шалтгаан нь 6.3 сая ам.долларын хэрэгтэй холбоотой асуудал бий. "Эрдэнэт" үйлдвэрт зэсийн худалдааны гэрээ хийсний ёндоонд 6.3 сая ам.доллар Монголд орж ирсэн байдаг юм. Үүний таван сая ам.долларыг "Женко"-гийн цэргүүд зарцуулсан. Харин 1.3 сая ам.долларыг Т.Бадамжунайтай холбож тайлбарладаг. Өөр нэг юм бас байна. Ёндоонд авсан таван сая ам.долларынхаа 1.5 саяар нь "Майдар" хотын хоёр км автозам тавьсан байгаа юм. Үүнийг "Женко"-гийн цэргүүд өөрсдөө мэдүүлсэн. Энэ хэрэг нь илрэх гээд байгаа учраас Т.Бадамжунайг авчирсанд Ерөнхийлөгч асан Х.Баттулга үнэн голоосоо эгдүүцэж, айж, балмагдаж байна. Т.Бадамжунайг зугтаалгасан хүн нь "Женко" шүү дээ " хэмээсэн.
Ийнхүү экс Ерөнхийлөгч нэр дурьдагдсан Т.Бадамжунайтай холбоотой хэрэг яг одоогоор намжмал байдалд байна.
Сануулахад, ХХААХҮ-ийн сайд асан Т.Бадамжунайд авсан цагдан хорих таслан сэргийлэх арга хэмжээг ирэх сарын 5 хүртэл нэг сарын хугацаагаар сунгасан. Энэ талаар шүүхээс "Эрүүгийн хэрэг хянан шийдвэрлэх тухай хуулийн 14.10 дугаар зүйлийн 2 дахь хэсэгт заасан үндэслэл буюу хэргийн ээдрээ төвөгтэй байдлыг харгалзан үзэж цагдан хориог сунгасан" хэмээн мэдээлж байгаа юм.
