Явж явж үе үеийн улс төрийн мяндагтнуудаас Ерөнхий сайд асан Д.Бямбасүрэнгийн хүүхдүүд улс төрчийн насанд хүрээд байгаа юм байна. Харин бусдынх нь хүүхдүүд нас, туршлага зорилго чиглэлээр аавуудыгаа залгасангүй юу даа. Энэ сонгуульд түүний хүү Хүдэр-Ян, охин Энхбайгаль нар өрсөлдөх гэж байна. Эднийх нийт зургаан хүүхэдтэй айл.

Хүдэр-Яны тухайд Москвагийн эрчим хүчний дээд сургуульд Турбин хөдөлгүүрийн зохион бүтээгчийн ангид явсан бөгөөд цаг үеийн нөхцөл байдлаас хамааран Политехникийн дээд сургуулийн дулааны ангид орж төгссөн байна. Өөр нэг сонирхолтой зүйл нь Д.Бямбасүрэн энэ хүүгээ өөрийн гараар эх барьж авч байсан гэдэг. Уг нь охин төрнө гээд Хонгорзул гэдэг нэр өгөхөөр бодсон байсан ч хүү төрсөн тул Хүдэр-Ян гэж нэрлэжээ. Өвөрмөц энэ нэрний утга нь том хүдэр гэдгийн Хүдэр, ян сарьдаг мөнх цастай уулын оргил гэсэн утгын Ян гэдэг үгсийн нийлэмж аж.

Харин охин Б.Энхбайгаль нь инновацийн салбарт чамгүй их зүйл хийсэн аж. Жинтэй үгээ гэрээсээ чулуудан сэтгүүлчид, улс төрчдийг гаднаа дугаарлуулдаг ясны улс төрч хүүхдүүдийнхээ улс төрийн карьерын талаар харин юу ч дуугарахгүй байна. Яс хүн яс л байдаг хойно алдвал зэмлэж буруудвал хэзээ ч тэндээс татаж гаргахаа мэдэж байгаа байлгүй гэж хүмүүс ярилцаж байна.

Х.Онон