"Боловсрол суваг" телевиз "Эндемол Шайн" /Endemol shine/ группийн "Your face sounds familiar" буюу "Яг түүн шиг" шоуг албан ёсны эрхтэйгээр хүргэж байгаа билээ. Оролцогчид нь арван дугаарын турш монголын болоод дэлхийд алдартай уран бүтээлчдийн дуу хоолой, үйл хөдлөлийг дуурайн, тэдний дүрд хувиран өрсөлддөг энэхүү сонирхолтой шоу өдгөө гурван дугаар хийгдсэн нь үзэгчдийн талархалыг хүлээгээд байна.
"Яг түүн шиг" шоунд "Камертон" хамтлагийн дуучин Л.Ган-Эрдэнэ, дуучин Б.Амархүү, Б.Маралжингоо, жүжигчин Н.Мөнхсоёл, загвар өмсөгч Э.Энхболд, загвар өмсөгч С.Сарнай, дуучин П.Баярцэнгэл, дуучин Э.Энхзол нар сонгогдон өрсөлдөж буй.
Манай сурвалжлах баг энэхүү шоу болж байгаа Crocus event hall-д очиж эрч хүчтэй, хөдөлмөрч, чадварлаг залуустай халуун дотно яриаг өрнүүлсэн юм.
Г.Ханхүү: "Монгол HD" телевизийн урлагийг нэг шат ахиулсан, бид тэдэнтэй мөр зэрэгцэн алхах хэрэгтэй байна
"Яг түүн шиг" шоуны зорилго хийгээд үйл явцын талаар тус шоуны ерөнхий продьюсер Г.Ханхүүгээс зарим зүйлийг тодрууллаа.
-Юуны өмнө дэлхийн оддыг дэргэдээсээ харах боломжийг олгосон гайхалтай шоуг зохион байгуулж буй танай телевизэд баяр хүргэмээр байна. Та бүхэн энэ шоуг зохион байгуулсанаар нийгэмд ямар мэссэж өгөхийг зорьсон бэ, өөрөөр хэлбэл шоуны зорилго юу байв?
-Энэ шоу дэлхийн 39 оронд хийгдсэн. Манайх дөч дэх орон нь болсон. Одоо нэмэгдсэн байх. Сүүлийн үеийн мэдээллийг аваагүй байна. Бид өмнө нь "Эндемол Шайн" группээс "50 саяын уналт" нэвтрүүлгийг авч байсан. "Яг түүн шиг" шоуг яагаад хийсэн бэ гэдгийг ярихын өмнө нэг зүйлийг хэлмээр байна. Монгол HD телевиз "Авьяаслаг монголчууд" шоуг зохион байгуулсанаар телевизийн урлагийг нэг шат ахиулсан гэж бид харж байгаа. Хэдийгээр нэг салбарт ажиллаж байгаа өрсөлдөгч хэдий ч тэдэнд баярлалаа гэж хэлэх нь зүйтэй болов уу. Энэ шоуг хийж буй шалтгаан нь нэгдүгээрт, бид тэдэнтэй мөр зэрэгцэн алхах хэрэгтэй байна.
Уг нь шоуг намар хийхээр тооцоолж байсан боловч, сонгуулийн үеэр үзэгчдэд үзэх юм бага байх болов уу гэх мэт хүчин зүйлүүдийг харгалзаад эрт гаргасан. Боловсрол суваг телевизийн хувьд сонгуулиас ангид, өөр чиглэлийн контенттэй учраас бид үзэгчиддээ зориулсан энтертаймент нэвтрүүлэг хийх зорилго тавьсан.
Хэвлэл мэдээллийн хэрэгслээр маш их стресстэй мэдээ, мэдээлэл и гарч байна. Боловсрол суваг телевиз өөрөө мэдээ байхгүй, танин мэдэхүйн болоод соён гэгээрүүлэх нэвтрүүлгүүдийг хүргэдэг.
Энэ нэвтрүүлгийн хувьд танин мэдэхүйн болоод соён гэгээрүүлэх чиглэлд орохгүй хэдий ч үзэгчдэд ням гаригийн орой гэр бүлээрээ үзэх боломжтой "цагаан" инээд бэлэглэх зорилготой шоу.
Мөн эдийн засгийн хүндрэлтэй үед уран бүтээлчдээ санхүүгийн хувьд тодорхой хэмжээгээр дэмжиж байна. Үндсэндээ ивээн тэтгэгчид байгаа учраас бид шоугаа амжилттай зохион байгуулаад явж байна. Шоу маань өөрөө ашгийн бус. Тухайлбал, шоуны урилганууд хүртэл үнэ төлбөргүй тараагдаж үзэгчиддээ бэлэг барьж байгаа. Мөн оролцогчдын шагналын мөнгөнөөс татвар авахгүй байгаа гээд тоочвол олон зүйл бий.
-Шоуны оролцогчдыг яаж сонгосон бэ?
-Бид анх оролцогчдыг 40-өөс дээш насны хоёр, хүүхдүүдийн дуртай уран бүтээлчдээс хоёр гэх зэргээр ангилж сонгоё гэсэн бодолтой байсан. Гэхдээ тэр зарчмаар яваагүй. Одоо сонгогдсон оролцогчид маань бүх шалгуурыг хангаж байгаа учраас хүүхэд, хөгшидгүй үзэж байгаа гэж ойлгож байгаа.
Шүүгч Г.Ганхүү: Энхболд, Сарнай, Мөнхсоёл гурвыг маш их үнэлж байгаа
-Амралтын өдөр үзэгчдийг цэнхэр дэлгэцийнх нь өмнө уясан сайхан шоу болж байна. Та "Яг түүн шиг" шоуг ач холбогдлынх нь хувьд хэрхэн харж байна вэ?
-Монголчууд бид дэлхийд хоёр зүйлээр нэгт яваад байх шиг байна л даа. Нэгдүгээрт, нэг хүнд ногдох телевизийн тоогоор манайх тэргүүлж байна. Цөөн хүн амтай жижиг зах зээлд энэ олон телевиз яагаад үйл ажиллагаа явуулаад оршин тогтноод байна вэ гэдгийг бизнесийн зарчмаар харахаар буруу байгаад байгаа юм. Тодорхой зорилгоор улс төрчид телевиз байгуулаад байгаа нь контент нь өөрөө захиалгатай ч юм шиг харагдаад байдаг. Үүнийг эвдэж, сөрж байгаагаараа телевизийн урлагт дэвшилт авчирч байгаа болов уу гэж харж байгаа. Хоёрдугаарт зөвхөн монгол контент гэхээсээ илүү дэлхийтэй хөл нийлүүлэн алхаж чадаж байна. Даяарчлагдсан нийгэмд дэлхийн аль ч орноос дутахааргүй шоу, тэр дундаа олон улсын контентийг албан ёсны эрхээр нь аваад стандартынх нь дагуу хийж чадна гэсэн том баталгааг боловсрол телевизийнхэн харууллаа гэж бодож байна.
-Сонгуулиар амьсгалж эхэлсэн энэ өдрүүдэд танай шоу үзэгчдэд тархиа амраах амралт болж байх шиг байна?
-Цаг үе нь ингээд таарчих шиг боллоо. Сонгуулийн энэ заваан улстөржилтийн хажуугаар хүмүүсийн стрессийг тайлах, тэр дундаа хамгийн сүүлд авсан мэдээллээр максима гээд телевизүүдийн рейтинг тогтоодог байгууллагын мэдээллээс харахад манай шоу 70 гаруй хувийн хандалттай байна. Өөрөөр хэлбэл гурван хүний хоёр нь энэ шоуг үзэж байна гэсэн үг. Тэгэхээр утга учиргүй их улстөржсөн, эдийн засгийн хямралтай энэ үед хүмүүсийг баярлуулж, инээлгэж, хүлээлт бий болгосон, цагаа олсон нэвтрүүлэг болсон нь том онцлог нь юм болов уу гэж харж байна.
-Оролцдогчоосоо хэнийг илүү үнэлж, бас хувьдаа дэмжиж байгаа вэ?
-Шоу маань ид дундаа явж байна. Тийм учраас оролцогчдоо сайн, муу, илүү дутуу гэж ярьж болохгүй л дээ, ёсзүйгүй асуудал байх. Харин дуулах ур чадвар илүү давамгайлсан ийм шоунд дуучидтай өрсөлдөхөөр маш том зориг гаргаж орж ирсэн Энхболд, Сарнай, Мөнхсоёл гурвыг мундаг залуучууд байна гэж маш их үнэлж байгаа.
-Ингээд "Боловсрол суваг" телевизийн "Яг түүн шиг" шоунд оролцож буй уран бүтээлчидтэй товчхон ярилцсанаа хүргэж байна-
Дуучин Б.Маралжингоо:"Яг түүн шиг" шоу багын мөрөөдлийг минь биелүүлсэн
-Шоуг чимж, үзүүштэй болгож буй шилдэг оролцогч бол яах аргагүй Та мөн. Ингэхэд Б.Маралжингоо яагаад энэ шоунд яагаад оролцох болов?
-"Яг түүн шиг" шоу бол өөрөө маш алдартай. Дээрээс нь миний үзэх дуртай шоу. Манайд албан ёсны эрхтэйгээр өндөр түвшинд зохион байгуулах болсонд хувьдаа баяртай байсан. Өөрийгөө сорих том боломж гэж хүлээж аваад оролцохоор болсон.
-Хэнийг дуурайхад илүү ойр, хэнийг дуурайхад хүндрэлтэй хэцүү байв?
-Бүх үзүүлбэр хэцүү байсан. Маш их хөдөлмөр, чадвар шаарддаг. Шоу дуучдад илүү хялбар юм шиг харагдаж магадгүй. Хоолойгоо бэлдэх бичүүлэхээс эхлээд бүх юм нь маш нарийн. Гэхдээ миний хувьд дуучин болохоосоо өмнө бүр багаасаа толины өмнө зогсоод шүтэж, биширдэг хайртай дуучнаа дуурайж дуулж бүжиглэдэг байсан багынхаа мөрөөдлийг биелүүлж байгаа болохоор үнэхээр гоё байна.
-Таны дуурайсан оддоос холбогдож санал сэтгэгдэлээ хэлсэн хүн байгаа юу. Дуучин Эми вайн хаусыг дууг та гайхалтай дуулсан. Өөрт чинь ямар үзүүлбэр чинь хамгийн гоё байсан бэ?
-Байгаа. Баярлалаа. Чимидцэеэ гуайн Тэнгэр ээж минь өршөө дууг хүүхэд байхаасаа сонсож, дуулж өссөн. Би гэлтгүй монголчууд сонсож өссөн гайхалтай сайхан дуу. Хэзээ ч, хаана ч сонссон өмөлзөөд сонсдог дуу маань. Бас ээжийн минь, эмээгийн минь хамгийн хайртай дуу. Тэр утгаараа энэ дууг чин сэтгэлээсээ, зүрхнээсээ дуулсан. Энэ үеийг хэзээ ч мартахгүй, миний амьдралын хамгийн аз жаргалтай, дурсгалтай үе минь болж үлдэнэ.
-Цаашид ямар дуучны дуу таараасай гэж хүсч байна вэ?
-Ямар ч дуу таарсан хичээгээд, өөрийн хүч бололцоогоо дайчлаад амжилттай оролцоод явна гэж бодож байна. Гэхдээ миний хувьд Яг түүн шиг шоу тэмцээн уралдаан гэхээсээ илүү гайхалтай авьяаслаг хөдөлмөрч залуустай дотны найз нөхөд болох боломж олгосон гайхамшигтай цаг үе тохиож байна гэж бодож маш их баяртай байна. "Камертон" хамтлагийн дуучин Л.Ган-Эрдэнэ, дуучин Б.Амархүү, жүжигчин Н.Мөнхсоёл, загвар өмсөгч Э.Энхболд, загвар өмсөгч С.Сарнай, дуучин П.Баярцэнгэл, дуучин Э.Энхзол нар бол гайхалтай залуус. Тэднээр маш их бахархаж байна.
-Уран бүтээлчийн хувьд өөрийгөө шинээр нээх, сорих бас нэг боломж юм шиг харагдаж байна л даа?
-Тийм шүү. Яагаад гэхээр жүжиглэх, дүрд хувирах боломж гарч байсангүй. Энэ шоунд орсоноор өөрийгөө тодорхой хэмжээнд нээгээд, таниулаад сьюрприз дүүрэн байна.
Загвар өмсөгч С.Сарнай: Загвар өмсөгчдийг явдалтай, дэл сул гэж ярьдаг нь ташаа ойлголт
-Сайн байна уу? Юуны өмнө Танд энэ өдрийн мэндийг хүргье, бидний урилгыг хүлээн авсанд баярлалаа?
-Баярлалаа. Та бүхэнд ч гэсэн өдрийн мэнд хүргэе.
-"Яг түүн шиг" шоунд оролцож байгаа гол зорилго тань юу вэ? Энэхүү шоунд орсноор нийгэмд ямар мессеж хүргэе гэж бодсон бэ?
-Гол зорилго нь бол мэдээж өөрийгөө задлах, хөгжүүлэх. Учир нь үүнээс өмнө хэзээ ч ингэж дуулж, бүжиглэж байгаагүй. Мөн нийгэмд байгаа энэ их стрессийг алга болгож, илүү шоу тал руугаа хүмүүсийг хөгжөөж, хүмүүсийн муу бодлыг арилгах, ийм л зорилготой.
-Таныг энэ шоунд оролцож байгааг тань гэр бүлийнхэн чинь хэр үнэлж байгаа вэ? Мөн хэр дэмжиж байгаа вэ?
-Манай гэр бүлийнхэн намайг маш сайн дэмжиж байгаа шүү.
-Та энэхүү шоуны туршид Монголын болон Дэлхийн алдартнуудыг маш гайхалтай дуурайж байна. Та өөрийн зүгээс өмнө ямар алдартныг дуурайж оролцохыг хамгийн их хүсэж байсан бэ?
-Би Хар сарнай хамтлагийн Амараа ахыг хүндэлж, биширч явдаг. Энэ утгаараа түүнийг дуурайхыг хүсч байсан. Энэхүү хүслээ маш амжилттайгаар биелүүлсэндээ баяртай байгаа.
-Олон топ модель, загвар өмсөгчид дундаас та ганцаараа энэ шоунд сонгогдон оролцож байгаа. Олон нийтийн зүгээс ирж байгаа аливаа хандлагууд хэр мэдрэгдэж байна вэ?
-Ер нь хүмүүс загвар өмсөгчид явдалтай, дэл сул гэж ярьдаг. Энэ бол ташаа ойлголт юм. Ялангуяа өнөөдөр /2016-5-24/ миний тухай Ugluu.mn сайт дээр нүцгэн зургийг маань тавиад маш муухай мэдээлэл нийтэлсэн байсан. Би тэр сайт руу залгаж хэлтэл ямар мэдээлэл тавих нь бидний дур гэж хэлээд утсаа салгасан. Энэ бол хүний нэр хүндэд халдсан бүдүүлэг асуудал шүү дээ. Би энэ тал дээр маш их эмзэглэсэн.
-Ярилцлага өгсөн танд баярлалаа. Таны шоу болон цаашдын ажилд тань өндөр амжилт хүсье.
-Баярлалаа. Та бүхэнд бас ажлын өндөр амжилт хүсье.
Дуучин Б.Амархүү: Өөрийгөө өөр өнцгөөс харуулахыг хичээж байна
Сайн байна уу? Юуны өмнө танд энэ өдрийн мэндийг хүргье, мөн манай урилгыг хүлээн авсан танд баярлалаа?
-Баярлалаа. Чамд ч бас энэ өдрийн мэнд хүргэе.
-Бидэнтэй шоунд оролцож байгаа сэтгэгдлээсээ хуваалцаач?
-Сэтгэгдэл маш өндөр байна. Үзэгчдийн зүгээс ч халуун дулаанаар хүлээж авч байгаад баяртай байгаа.
-Ямар зорилгоор энэхүү шоунд оролцохоор болсон бэ?
-Олон нийт Б.Амархүү гэдэг хүнийг дуучин, хоёр кинонд тоглосон гэгдгээр түлхүү мэддэг. Мөн Universe Best Songs нэвтрүүлэгийн шүүгчээр ажиллаж байсан талаар нь маань бас мэддэг. Тийм болохоор Монголынхоо ард түмэнд өөрийгөө жүжигчин гэдэг өөр өнцгөөс харуулахыг энэ удаад хичээж байна.
-Гэр бүлийн тань зүгээс хэр дэмжиж байгаа вэ?
-Мэдээж маш сайн дэмжиж байгаа, бүгдээрээ мессеж явуулж байгаа гэдгээ хэлсэн. Мөн үзэгчдийн суудлаас орилж дэмжинэ гэх мэт. Ялангуяа манай эхнэр загвар өмсөгч учраас эмэгтэй дүрүүд дээр алхалт, тайзан дээр ямар байх гэх мэт тал дээр маш сайн зааж өгч байна.
-Та өөрийн зүгээс цаашид Яг түүн шиг шоунд ямар алдартныг дуурайж оролцохыг хамгийн их хүсэж байна вэ?
-Попын хаан Micheal Jackson, Justin Timbarlake.
-Шоуны талаарх сэтгэгдлээсээ хуваалцсан танд баярлалаа. Таны цаашдын уран бүтээлд тань өндөр амжилт хүсье.
-Баярлалаа. Та бүхэнд бас ажлын өндөр амжилт хүсье.
Э.Энхболд:Хүмүүс намайг загвар өмсөгчөөр л төсөөлдөг, үнэнийг хэлэхэд би энэ дүр төрхөөсөө уйдаад, залхчихсан
-Шоунд оролцож буй сэтгэгдэлээсээ хуваалцаач. Миний хувьд шоуны гэнэтийн бэлгүүдийн нэг нь та байсан?
-Сэтгэгдэл маш өндөр байна. Дэлхийн хэмжээний том шоуны анхны цувралд шилдэг найман оролцогчийн нэг болоод оролцож байгаадаа туйлын баяртай байгаа. Миний хувьд загварын чиглэлээр 12 дахь жилдээ ажиллаж байна. Хүмүүст Э.Энхболд гэхээр загвар өмсөгч л төсөөлөгддөг. Үнэнийг хэлэхэд би тэр дүр төрхөөсөө уйдаад залхчихсан. Тийм болохоор өөрийгөө эвдсэн, хувирсан зураг авалтад оролцох дуртай байсан. Хүслийг минь биелүүлсэн "Яг түүн шиг"шоунд оролцоод өөрийгөө сориод явж байгаа нь гайхалтай байна.
-Өөрийгөө боломжийн харуулчихсан байх шүү. Ингэхэд танд хэнийг дуурайхад илүү ойр, хэнийг дуурайхад хэцүү санагдав. Ер нь мэргэжлийн дуучидтай өрсөлдөх ямар байна?
-Батчулуун ахыг дуурайхад илүү дөхөм байлаа. Дуунуудыг нь дуулж, сонсдог болохоор ойр байсан болов уу. Харин Төмөрбаатар гуай, казаки хоёрыг дуурайхад хүнд байсан. Тэр дундаа казакийг дуурайж дуулж бүжиглэхэд хүнд байсан. Загварын ертөнтөд олон жил ажилласан хэрнээ өндөр өсгийт дээр нэг ч удаа гарч үзээгүй. Анх удаа өмсөхдөө мэргэжлийн бүжигчдийн хүнд элементтэй бүжгийг бүжиглэж дуулахад чанга байсан шүү /инээв/
-Дараагийн үзүүлбэртээ хэр бэлдэж байна даа?
-Боломжийн. Өөрийн бүхий л нөөц бололцоог дайчилж тэмцээндээ бэлдэж байна даа.
-Цаашид хэнийг дуураймаар байна, хэний ямар дуу таарвал Энхболд үзүүлээд өгөх юм бол?
-Эхний гурван үзүүлбэр дээр гурван өөр хүний дүрд хурвирлаа. Амаргүй байлаа. Одооноос хэн байсан ч хамаагүй хийнэ ээ, чадна аа гэж бодож байгаа.
Сурвалжилсан: А.Буянгэрэл
