Шинэ коронавирусээс урьдчилан сэргийлэхийн тулд Монгол Улс чадлын хэрээр л арга хэмжээ авч байна. Бас ч үгүй бахархам амжилт.

Гэхдээ энэ цаг мөчийг ашиглаж, улстөржихгүй ээ гэчхээд өөрөө улстөржүүлээд суух юм даа Л.Оюун-Эрдэнэ сайд. Өнгөрөгч баасан гарагт УИХ-ын чуулганы нэгдсэн хуралдаанд Засгийн газраас “Шинэ коронавирусийн халдварын өнөөгийн байдал, халдвараас урьдчилан сэргийлэх чиглэлээр хэрэгжүүлж байгаа үйл ажиллагаа”-ны талаар мэдээлэл сонссон. Энэ үеэр Засгийн газрын ХЭГ-ын дарга Л.Оюун-Эрдэнэ “Муу эр дайнд хөөрнө гэдэг шиг Эрүүл мэндийн дэд сайд байсан гэх Амарсанаа гэж нөхөр Хятад явна гээд балайраад байх хэрэггүй. Тэр хүн очлоо гээд Хятад улс хүлээж авахгүй. Энэ улстөржих сэдэв биш. Цаашлаад мэргэжлийн байгууллагад ажиллаж байсан, дэд сайд байсан хүн хариуцлагагүй зүйл хийгээд байвал эрүү үүсгэх шаардлагатай болно шүү” хэмээн сүрдүүлж байна билээ.

Засгийн газрын зүгээс авч хэрэгжүүлж байгаа арга хэмжээ нь сайшаалтай боловч эрхэм сайдтаны хэлж байгаа нь өөрөөсөө бусдыг үл хүндэтгэж, бүр хууль цаазаар далайлгаж байгаа нь хэн нь улстөржүүлж, өөрт ашигтайгаар эргүүлэх гээд байгааг нотолж байлаа. Засгийн газрын ХЭГ-ын дарга хүн өнөөдөр өмнөх дэд сайдаа мэдэхгүй байхын зэрэгцээ өөрөөс нь илүү боловсролтой, олон улсад хүлээн зөвшөөрөгдсөн мэргэжлийн эмч, судлаачийг элдэвлэж суугаа нь гунигтай.

Ядаж л УИХ-ын гишүүн болж, тангараг өргөсөн тэр эмчийн тангараг гэж байдаг гэдгийг мэддэг болов уу. Улстөрч боллоо гээд тангарагтаа үнэнч байлгүй шоудаж явдаг бол эрүүл мэндийн салбарынхан өөрөөс нь өөр гэдгийг гадарлах болов уу.

Монгол Улсын хүний эмч “Эмч би, Энэрэнгүй үзэл, буяны үйлсийг эрхэмлэн дээдэлж, Эмчийн ариун ёс, төрийн хуулийг чандлан сахиж, Эрдэнэт хүмүүний амь нас, эрүүл мэндийн төлөө Эрдэм чадал, бие сэтгэлээ бүрнээ зориулж явахаа
Эх орон, ард түмэндээ андгайлан тангараглая, тангараглая” гэж тангараг өргөдөг. Тэгээд ч Л.Оюун-Эрдэнэ сайдын таних байтугай мэдэх ч үгүй яваа Эрүүл мэндийн дэд сайд Ж.Амарсанааг монголчууд “элэгний” хэмээн ихэд сайн мэднэ. Тэр Токиогийн Их Сургуульд эрүүл мэндийн шинжлэх ухааны Mагистр , Анагаах Ухааны Докторын зэрэг хамгаалж, АНУ-ын Харвардын Их Сургуулийн Анагаахын сургуулийн Докторын дараах програмд ажиллаж багшилж явсан туршлагатай. Хаппи Веритас Элэгний Төв Лабораторид ерөнхий захирал, Монголын Элэгний Эмгэг судлалын холбооны Ерөнхийлөгч, Ази Номхон Далайн Элэгний эмгэг судлалын холбооны зөвлөхөөр ажилладаг нэгэн.

Энүүхэндээ гэхэд дөрвөн жилийн настай парламентад сууж буй Л.Оюун-Эрдэнэ Монгол Улсын Засгийн газрын ХЭГ-ын дарга гэх албыг хашиж буйдаа аархаж байхад Ж.Амарсанаагийн хувьд эзэмшсэн, мэргэжил боловсролоороо дэлхий нийтэд хүлээн зөвшөөрөгдсөн нэгэн. Тийм байтал эрхэм сайдтан хэн нь улстөржүүлж буйгаа ч үл ойлгон попорч суугаа нь харин дэндүү эмгэнэлтэй.