Одоогоос гурван жилийн өмнөх хамгийн дуулиантай хэргийн нэг нь 256, зарим хэрэгт 800 гэж тоологдсон хятад иргэдийн цахим залилан байсан. Энэ хэргийн толгойлогчид нь Жонг Хуа /Zhong Hua/, Ей Тинг /Ye Ting/ нар байжээ. Бүлэглэл нийт 11 хятад гишүүнтэйгээс гадна Монгол талаас М.Эрхбаяр элссэн. Тэд “Ви Чат”, “Дун Фан Цай Фү”, “Тунхуа шүнь Цайжин”, “Вэйтуо Жяо И”, “Тунда Шинь Жинрун Жундуань”, “Телеграм”, “Кюү Кюү”, “Скайп” зэрэг цахим хэрэгсэл ашиглан хуурамч хаяг үүсгэж, хувьцаа худалдах, худалдан авах үйл ажиллагаанаас ашиг олж байгаа мэтээр бусдыг хуурч, бодит байдлыг нуух замаар төөрөгдөлд оруулж, зохиомол байдлыг зориудаар бий болгон, бусдын эд хөрөнгө өмчлөх эрхийг шилжүүлэн авахад шууд чиглэсэн залилах гэмт хэрэг байнга үйлдэж, ашиг олох зорилгоор зохион байгуулалттай байгуулсан гэмт бүлэгт элссэн гэж буруутгагдсан. Мөн 2019 оны 9-р сараас 10-р сарын 29-ний өдөр хүртэлх хугацаанд 230 хүнийг Баянзүрх дүүргийн 14-р хорооны нутаг дэвсгэрт үйл ажиллагаа явуулдаг “Амар” зочид буудалд, 20 хүнийг Баянгол дүүргийн 19-р хорооны нутаг дэвсгэрт үйл ажиллагаа явуулдаг “Секрет Гарден” зочид буудалд, 84 хүнийг Чингэлтэй дүүргийн 8-р хорооны нутаг дэвсгэрт үйл ажиллагаа явуулдаг “Кентавр” зочид буудалд, 264 хүнийг Баянзүрх дүүргийн 13-р хорооны нутаг дэвсгэрт үйл ажиллагаа явуулдаг “Ориентал” зочид буудалд тус тус байрлуулж, олон тооны өндөр үзүүлэлт бүхий суурин компьютер, зөөврийн компьютер, гар утас зэргийг ашиглан “Ви Чат”, “Дун Фан Цай Фү”, “Тунхуа шүнь Цайжин”, “Вэйтуо Жяо И”, “Тунда Шинь Жинрун Жундуань”, “Телеграм”, “Кюү Кюү”, “Скайп” зэрэг цахим сүлжээнд хуурамч хаяг үүсгэж, улмаар хувьцаа худалдах, худалдан авах үйл ажиллагаанаас ашиг олж байгаа мэтээр бусдыг хуурч, бодит байдлыг нуух замаар төөрөгдөлд оруулж, зохиомол байдлыг зориудаар бий болгон, бусдын эд хөрөнгө өмчлөх эрхийг шилжүүлэн авахад шууд чиглэсэн залилах гэмт хэргийг байнга үйлдэж ашиг олох зорилгоор зохион байгуулалттай гэмт бүлэг үйлдэхийг завдсан гэмт хэрэгт тус тус холбогджээ. Залиланг нь товчхон дүрсэлбэл өөрсдийгөө бусдад хувьцааны багш гэж итгүүлэн улмаар итгэлийг олж тэдийг өөрийн компанийн платформд татан оруулж тухайн санхүүгийн бүтээгдэхүүнийг худалдан авахуулдаг байжээ. Гол хохирогч нь Тайландын “Стар Петролиум Репинг Паблик Компани лимитед” /Star Petroleum Refing Public Company Limited/ гэх компани агаад нэг тэрбумаар тооцогджээ. Түүнээс гадна Камбож улсад цахим залилангаар олсон орлогоо эргэлтэнд оруулахын тулд Монголд “Мултидимэншионал интернэшнл” компани байгуулж дансаар нь шилжүүлж авчээ. Уг мөнгөөр “Лексус-570”, “Тоёота Ланд крузер-200” загварын автомашин тус бүр хоёр ширхэг, “Тоёота Альфард” загварын автомашин гурван ширхэг, “Форт еверест” загварын автомашин нэг ширхэг, “Тоёота Акуа” загварын автомашин нэг ширхэг буюу нийт есөн ширхэг автомашин худалдан авсан, өөрсдийн хууль бус үйл ажиллагаа явуулахаар байрлаж байсан орон сууц, оффис, зочид буудлуудын түрээсийн төлбөрийг төлжээ. Залилан хийх хятад иргэдийг урьж авчирах ажлыг “монгол” талын Б.Эрхбаяр болон Б.Гантигмаа нар хийжээ. Эрхбаяр урилгын бичиг баримт бүрдүүлэх 279-300 орчим хятад хүмүүсийн гадаад паспортын зураг болон цээж зургийг өгөөд файл болгонд нэрийг нь бич гэжээ. Мөн Уул гэж өвөрмонгол захиралын имэйл хаягаар өдөр болгон шахуу хятад иргэдийн гадаад паспортын зураг болон цээж зураг ирдэг байжээ. Ингээд ГХЯ-ны вэб сайтад нэвтэрч анкет бөглөж, компанийн нэр дээр албан бичиг бичиж мөн төлбөрийг төлөөд урилга гарч хятад иргэд ирдэг. Ирсэн хятадуудыг “Ориенталь”, “Секрет Гарден” зэрэг хятад эзэдтэй буудлуудад тараан байрлуулдаг. Компаний дотоод журам ёсоор өглөө зургаан цагт “ажил” эхэлдэг. 11 цаг 30 минутын үед завсарлаж хоол идэн 13 цаг хүртэл амардаг. Үдээс хойшхи ажил 17 цаг 30 минутын үед мөн завсарлаж оройн хоолоо 19 цаг хүртэл иднэ. Оройн хоолоо идчихээд үргэлжлүүлэн 23 цаг хүртэл ажиллана. Хятад ажилчиддаа сарын 3000-5000 юанын цалин өгдөг байжээ.
