Анхаарал болгоомжгүйгээс  үйлдвэрлэлийн болон ахуйн элдэв осол аваар  тарсахгүй байна. Галын дуудлага ч нэмэгдэж  буй аж. Өнгөрсөн шөнө “Дашваанжил” ХХК-нийн агуулахад  хийн баллон дэлбэрч гал гарсан мэдээ ирлээ. Гэвч энэ талаар тус компанийнхан нууцалж байна. Лавлахаас утсыг нь олж аваад хоёр удаа залгаж, яг юунаас болоод баллон дэлбэрсэн, хэдий хэмжээний гал гарсан, хэрхэн унтраасан зэргийг тодруулах гэсэн боловч харилцуурын цаанаас нэгэн эмэгтэй “Энэ талаар мэдээлэх боломжгүй” гээд утсаа тасалж байлаа.  Харин  өөр эх сурвалжийн хэлснээр тус компанийн хийн баллоноос гарсан гал бага бус хохирол учруулсан бололтой. “Дашваанжил” компани нь Монголдоо хийн түлшний анхдагч гэгддэг бөгөөд Баянгол дүүргийн 20 дугаар хорооны нутаг дэвсгэрт үйл ажиллагаа явуулдаг ажээ. Хийн баллон дэлбэрч гал гарсныг нууцлах шалтгаан юу байсан юм бол. Нууцалж үлдээх сонирхлын цаана өөр ямар нэг томоохон гэмт хэргийн ул мөр байгаа юм биш биз. Ер нь нууцалсан бүхэн иймэрхүү олон янзын хардлагыг дагуулдаг. Юутай ч тэд нууцлаад өнгөрөх санаатай байгаа аж.

Б.Баяр

Эх сурвалж :Tumen.mn