Оны өмнөхөн арилжааны банкууд орон сууцны найман хувийн хүүтэй зээлээ хумьж, шалгуураа өндөрсгөж байна, ирэх оноос бүрэн зогсоож ч магад гэх яриа гарах болсон. Тэгвэл Монголбанкныхан “Найман хувийн хүүтэй зээлийг энэ онд үргэлжл үүлэн олгоно. Харин банкууд шалгуураа өндөрсгөхийг үгүйсгэхгүй” гэж мэдэгдээд буй. Уг зээлд хамрагдахын тулд 30 хувийг нь урьдчилан төлөөд үлдсэнийг нь 20 хүртэлх жилд төлж дуусгана, зээл хүсэгч иргэн банк, санхүүгийн байгууллагад хугацаа хэтэрсэн, чанаргүй зээлийн өргүй байх, зургаан хувийн хүүтэй орон сууцны хөнгөлөлттэй зээлд хамрагдаагүй байх зэрэг шаардлагыг Засгийн газраас гаргасан Ипотекийн зээлийн ерөнхий журамд тусгасан. Уг журамд “Банк ипотекийн зээлийн барьцаа болж буй орон сууцны чанар, ашиглалтын байдал, барьцаагаар үүргийн гүйцэтгэл хангуулах нөхцөлтэй холбоотой нэмэлт шаардлага тавих эрхтэй” гэсэн заалт бий. Тиймээс банкууд зээлдэгчид тавих нөхцөлөө өөрчлөх бүрэн боломжтой юм.

Банкууд орон сууцны зээл хүсэгчдэд ямар шалгуур тавьж буй, үнэхээр шалгуураа өндөрсгөсөн, эсэхийг тодрууллаа. ХААН банкнаас Орон сууцны ипотекийн санхүүжилтийн журамд заасан шаардлагаас гадна өнгөрсөн сараас зээл хүсэгчдэд нэмэлт шаардлага тавьж эхэлсэн гэнэ. Үүнд үндсэн зээл хүсэгч тэтгэвэрт гарах наснаас өмнө орон сууцны зээлээ төлж дуусах нөхцөл багтсан байна. Мөн үндсэн болон хамтран зээл хүсэгч нь тус банкны дансаар цалингаа авдаг байх, бизнес эрхэлдэг бол зээлийн төлбөр хийх орлого нь сүүлийн гурван сарын хугацаанд ХААН банкны дансаар дамжсан байх ёстой аж.

Төрийн банкныхан зээлийн шалгуураа өндөрсгөөгүй, Засгийн газраас баталсан журамд заасан шалгуурыг хангасан бүх хүнд зээл олгож буй гэсэн мэдээлэл өгөв. “Уг зээлийг цөөнгүй хүнд олгосон. Урьдчилгаагаа төлөх чадвартай иргэдийн олонх нь зээлд хамрагдчихсан, үлдсэн хэсгийнх нь санхүүгийн байдал тааруу, зээлийн нөхцөлийг хангах боломжгүй бололтой” гэж тус банкны ажилтан хэллээ. Хасбанкны тухайд үндсэн зээлдэгч нь цалингаа тус банкны дансаар дамжуулж авдаг, харилцагч нь байх ёстой гэсэн нэмэлт нөхцөл тавьсан байна. Хамтран зээлдэгчид энэ заалт хамаарахгүй аж. Иргэдийн ярьж буйгаар “Голомт”, Худалдаа, хөгжлийн банк бусдаасаа илүү шалгуур тавьж буй гэнэ. Гэтэл дээрх хоёр банк энэ талаараа мэдээлэл өгөхөөс татгалзсан юм.

Эх сурвалж: Zaluu.com