Нийслэлийн удирдах ажилтнуудын шуурхай зөвлөгөөн нийслэлийн “Хангарди” ордонд болж байна.

Өнөөдрийн байдлаар нийслэлд сайжруулсан шахмал түлшний баруун болон зүүн бүсийн үйлдвэрүүд хэвийн ажиллаж, нийт 14 шугамаар өдөрт 2100-2400 тонн түлш нийлүүлж байна. Нийслэлийн мэргэжлийн хяналтын газар түлшнээс 10 удаагийн дээж авч, чанар, стандартыг хянан ажиллаж буйг нийслэлийн Засаг даргын Тамгын газрын хяналт-шинжилгээ, үнэлгээний хэлтсийн дарга Х.Гантулга мэдээллээ. Шахмал түлшний 650 цэгт 31 компанийн 310 автомашинаар түлш түгээн нийлүүлж байна.

Сайжруулсан түлшний 95 мянган тонн нөөцтэй байна.

Тэрбээр, нийслэлийн нутгийн захиргааны нийт байгууллага төсвийн зардлаар шинэ жил тэмдэглэхгүй байх талаар өгсөн үүрэг даалгаврыг тодотгов. Тодруулбал, энэ талаар гарсан нийслэлийн Засаг даргын захирамж болон Засгийн газрын хуралдааны тэмдэглэлийг нийслэлий нутгийн захиргааны нийт байгууллагад хүргэж, хэрэгжилтийг хангуулан ажиллаж буйг мэдэгдлээ.

Сурагчдын амралтаар хүүхдүүдийг осол, гэмтлээс урьдчилан сэргийлж ажиллахыг үүрэг болгов.

ТЦА-ны нийслэлийн Замын цагдаагийн газрын дарга, хурандаа С.Баасанжав, нийслэлийн гудамж, замд өдөр болон шөнийн цагаар 191 цэгт 557 алба хаагч хяналт тавьж ажиллаж байгааг мэдээллээ. Нийслэлийн Цагдаагийн удирдах газрын дэд бөгөөд Нийтийн хэв журам хамгаалах газрын дарга, хурандаа Б.Оюутболд нийслэлд болж буй жагсаалтай холбоотойгоор Д.Сүхбаатарын талбайд өдөрт 50-60 иргэн хонож байгааг танилцуулав. Цаашид:

-жагсаал, цуглаантай холбогдуулан жагсагчдын эрүүл мэнд, аюулгүй байдлыг хангах ажлыг хуулийн хүрээнд анхаарч, чиг үүргийн дагуу ажиллах,

-Мөн ЕБС-ийн сурагчдын амралт эхэлсэнтэй холбогдуулан хүүхдүүдийг гэнэтийн осол, гэмтлээс урьдчилан сэргийлэх, сэрэмжлүүлэх, аюулгүй байдлыг хангах чиглэлээр тодорхой ажлыг зохион байгуулахыг тус тус үүрэг болгов.