“Ургах наран” хорооллын оршин суугчдын хэрэглэсэн цахилгааны төлбөрийн үлдэгдэл 99.7 сая төгрөг төлөгдөөгүй байгаагаас болж хэрэглээг нь түдгэлзүүлжээ. Тус хорооллын цахилгаан эрчим хүчийг Улаанбаатар цахилгаан түгээх сүлжээ ТӨХК “Бльюскай партнерс” ХХК-тай байгуулсан гэрээний дагуу хангадаг аж.
Гэвч “Бльюскай партнерс” компани уг хорооллыг ашиглалтад оруулснаас хойш оршин суугчдынхаа цахилгаан эрчим хүчний борлуулалтын ажлыг УБЦТС ТӨХК-д одоог хүртэл хүлээлгэж өгөөгүй гэнэ. Тиймээс “Ургах наран” хорооллын цахилгаан эрчим хүчний төлбөрийг 5102855 код бүхий хэрэглэгч болох “Бльюскай партнерс” компани УБЦТС ТӨХК-д төлөх үүргийг гэрээний дагуу хүлээх ёстой юм.
УБЦТС ТӨХК-иас “Бльюскай партнерс” компанид төлбөрөө барагдуулах мэдэгдэл, албан бичгийг удаа дараа өгч, төлбөрөө хэсэгчлэн барагдуулах гэрээ байгуулахын зэрэгцээ сууц өмчлөгчдийн холбоо, орон сууцны ашиглалт, засвар үйлчилгээг хариуцдаг “УНК” ХХК-ийн гүйцэтгэх захирал Б.Чинбат, “Бльюскай партнерс” ХХК-ийн ерөнхий нягтлан бодогч Б.Батчимэг нартай өр төлбөрөө барагдуулах талаар уулзалт хийх зэрэг ажлыг 2013 оноос хойш тасралтгүй зохион байгуулсан боловч үр дүнд хүрээгүй өдийг хүрчээ.
Энэ хугацаанд Баянзүрх дүүргийн иргэний хэргийн анхан шатны 1 дүгээр шүүхийн шүүгчийн 1 дүгээр сарын 29-ний өдрийн 750 тоот захирамж гарч “Бльюскай партнерс” компани нь УБЦТС ТӨХК-д тухайн цаг үеийн цахилгаан эрчим хүчний төлбөр болох 76.6 сая төгрөгийг төлөх шийдвэр гарсан боловч шүүхийн шийдвэрийг биелүүлээгүй байна.
Өнгөрсөн хугацаанд УБЦТС ТӨХК-аас “Ургах наран” хорооллын оршин суугчдын эрх ашгийг хүндэтгээд цахилгаан эрчим хүчээр хангаж байсан ч энэ оны тавдугаар сарын 19-ний байдлаар төлбөрийн үлдэгдэл 140 сая төгрөг болоход цахилгаан эрчим хүчийг мөн түдгэлзүүлжээ. Түдгэлзүүлснээс хойш 7 хоногийн дараа тус компанийн гүйцэтгэх захирал Ө.Ашхүү 27 сая төгрөгийг төлж, үлдсэн 113 саяыг нь тодорхой хуваарийн дагуу хэсэгчлэн барагдуулах гэрээ байгуулснаар хэрэглээг эргэн сэргээжээ.
Ингээд зургаадугаар сард үлдэгдлээс 25 сая төгрөг төлөхөөс 14.4 сая, долдугаар сард 25 сая төгрөг төлөхөөс 20.8 сая, наймдугаар сард 10 сая төгрөг төлөхөөс 5.8 сая төгрөгийг тус тус төлж байсан нь гэрээгээр хүлээсэн үүрэг биелэгдээгүй гэж дүгнэгдсэн тул тус хорооллын цахилгаан хэрэглээг дахин түдгэлзүүлээд байгаа юм байна.
УБЦТС ТӨХК нь “Бльюскай партнерс” компаниас “Ургах наран” хорооллын суугчдын цахилгаан эрчим хүчний борлуулалтыг хүлээн авах талаар судалж үзэхэд, 2013 оны 12 дугаар сарын 04-ний өдрийн 3878/2013 тоот техникийн нөхцөлийн дагуу цахилгаан түгээх сүлжээнд холбогдоогүй, КТПН-2159-ээс түр тэжээгдэж байгаа зэрэг зөрчил илэрсэн тул боломжгүй юм. Харин энэхүү зөрчлийг арилгасан тохиолдолд хорооллын суугчдын цахилгаан эрчим хүчний борлуулалтыг шуурхай хүлээж авах талаар “Бльюскай партнерс” компанид албан ёсоор мэдэгджээ.
Эх сурвалжwww.wikimon.mn
