Зураг: Сайдын тушаалын хавсралтыг өөрчилж хоёр өрөө байрыг нэг өрөө болгожээ гэв
-Б.БАТБАЯР ХУРАНДААД ХОЁР ӨРӨӨ БАЙР ОЛГОХ ШИЙДВЭР ГАРГАХДАА С.ЦЭРЭНЧИМЭДИЙН БАЙРЫГ НЭГ ӨРӨӨ БОЛГОЧИЖ-
Дэлхийн аварга, гавьяат тамирчин С.Цэрэнчимэдэд Батлан хамгаалах яамнаас өгсөн байр солигдсон гэх дуулиан дэгдээд өнгөрлөө. Баянзүрх дүүргийн наймдугаар хорооны нутагт цэргийн алба хаагчдын 63 айлын орон сууц өнгөрсөн наймдугаар сарын 7-нд ашиглалтад орсон. Тус байрнаас С.Цэрэнчимэдэд нэг өрөө орон сууц өгсөн ч түлхүүрийг нь сольсноос “Аваргадаа өгсөн байрыг сольжээ” гэх дуулиан дэгдсэн. Энэ тухай манай сонин өмнө нь дэлгэрэнгүй мэдээлсэн билээ. Батлан хамгаалах яамны Барилга захиалагчийн ажлын албаны хяналтын инженер Д.Содномдорж манай сонинд ярилцлага өгөхдөө “Батлан хамгаалах яамны ажилтнуудын орон сууц өнгөрсөн наймдугаар сард ашиглалтад орсон. Тус орон сууцны тавдугаар давхарт 29 тоотын 28.3 метр.кв байрыг С.Цэрэнчимэдэд өгөх талаарх Батлан хамгаалахын сайдын тушаал гарсан. Сайдын зөвлөл дээр хуралдаад энэ байрыг С.Цэрэнчимэдэд өгөх шийдвэр гарч, сайд тушаал гаргасан. Бусдад шилжүүлэх, зарах ямар ч боломж байхгүй” гэсэн билээ.
Гэтэл өнгөрсөн жил Батлан хамгаалах яамнаас “Алдар” спорт хорооны тамирчин, Дэлхийн аварга, гавьяат тамирчин С.Цэрэнчимэдэд хоёр өрөө байр бэлэглэж байгаагаа зарласан. Бэлгийн морины шүдийг үздэггүй ч хоёр өрөө байр яагаад нэг өрөө болчихов гэдэг асуудал гарч ирж байна. Эх сурвалжуудын ярьж байгаагаар түлхүүр солигдсон дуулиан дэгдэхээс бүр өмнө аваргын байрыг сольж, дотроо “зохицуулалт” хийчихсэн бололтой.
САЙД ТУШААЛ ГАРГАДАГ Ч ХУВААРИЛАЛТ ХИЙДЭГГҮЙ
Батлан хамгаалах яамны Барилга захиалагчийн ажпын албаныхан “Сайд л тушаал гаргадаг. Сайдын тушаалыг хэн ч зөрчих эрхгүй. Сайдын тушаалд С.Цэрэнчимэдэд тавдугаар давхрын 29 тоотын 28.3 метр.кв талбайтай орон сууц олго гэж тодорхой бичсэн” гэдэг мэдээллийг өгсөн. Гэтэл Батлан хамгаалахын сайд байр хуваарилах тухай ерөнхий тушаал гаргадаг юм байна. Харин хавсралтыг нь барилга хуваарилах ажлын комисс боловсруулж сайддаа танилцуулж батлуулдаг аж.
Батлан хамгаалахын сайд асан Д.Бат-Эрдэнэ 2014 оны арваннэгдүгээр сард цэргийн алба хаагчдын 63 айлын орон сууц хуваарилах тухай тушаал гаргажээ. Энэ үед барилга хуваарилах ажлын комиссын даргаар Төрийн захиргаа, удирдлагын газрын дарга н.Мөнх-Очир ажиллаж байсан байна. Сайдын уг тушаалын хавсралтад Алдар спорт хорооны тамирчин С.Цэрэнчимэдэд хоёрдугаар давхрын 13 тоотын 33.9 метр.кв хоёр өрөө орон сууц олгох тухай тодорхой бичсэн баримт байна. Энэ тушаал гарсны дараа өнөөх байр хуваарилах комиссын даргын ажлыг Батлан хамгаалах яамны дэд сайд А.Баттөр хүлээн авчээ. Ингэхдээ сайдын тушаалын хавсралтыг өөрчилж, С.Цэрэнчимэдэд 29 тоотын 28.3 метр.кв талбайтай байр олгохоор болжээ.
Зураг: С.Цэрэнчимэдэд хоёр өрөө байр олгох шийдвэр гэв
АЛБАНЫ ГУРВАН БАЙР АВСАН ГЭХ ХУРАНДАА Б.БАТБАЯР ЖАГСААЛТАД БАГТСАНЫ УЧИР
С.Цэрэнчимэдэд бэлэглэсэн хоёр өрөө байрыг нэг өрөө болгох шийдвэрийг дэд сайд А.Баттөр гаргасан баримтыг дээр өгүүллээ. Тэгвэл хурандаа Б.Батбаяр ямар учраас С.Цэрэнчимэдийн байр солигдсон гэх дуулианд нэр холбогдов гэдэг асуудал гарч ирнэ. Батлан хамгаалах яамны Бодлогын хэрэгжилтийг зохицуулах газрын тасгийн дарга, хурандаа Б.Батбаяр 63 айлын орон сууцнаас байр хүссэн өргөдөл гаргажээ. Яамандаа тасралтгүй арав гаруй жил ажилласан хурандаа цолтой эрхэмд байр өгөхөд юу нь буруу гэж. Гэтэл уг эрхмийг өмнө нь албаны хэд, хэдэн байр авсан гэх хэл ам яаманд гарчээ. Түүнтэй ижил цолтой албан тушаалтан яаманд гомдол гаргасан баримт байна. Түүнд “Хурандаа Б.Батбаяр нь Налайхын Гордокт Зэвсэгт хүчний 337 дугаар ангиас байр авсан. 15 дугаар хороолол дахь 48 айлын орон сууцнаас дахин байр авсан. Бөмбөгөрийн хажууд баригдсан байрнаас мөн л байр авч байсан” гэжээ. Эдгээр байрнууд нь бүгд албан тушаалынх аж. “Нэг хурандаа албан тушаалын гурван байр авчихсан байхад” гэдэг хэл ам гарч Б.Батбаяр хурандаад байр олгохгүй байх шийдвэрийг орон сууц хуваарилах комиссын анхны дарга гаргаж байжээ. Гэтэл дэд сайд А.Баттөр комиссын дарга болсныхоо дараа сайдын тушаалын хавсралтыг өөрчилж, Б.Батбаярт 39 тоотын 40 метр.кв хоёр өрөө байр олгох шийдвэр гаргажээ. Ингэхээр байр авахаар жагсаалтад орсон хүмүүсийн нэг нь хасагдаж таарна. Баянзүрх дүүргийн Засаг даргынтамгын газрын Цэргийн штабын дарга, хурандаа Ч.Цогтод өгөх байсан байрыг хасаад оронд нь Б.Батбаярыг оруулсан байна. Ингэж будлиантуулахдаа дэлхийн аварга С.Цэрэнчимэдийн байрын талбайг хасч нэг өрөө болгожээ.
Б.Батбаяр хурандаа цэд сайдтай нэг нутгийнх. Нэг нутаг, нэг үеийнх болохоор дотно байдаг талаар яамныхан ярьдаг юм билээ. Тиймээс нутгийнхаа хурандааг дэмжихдээ дэлхийд Монголын нэрийг цуурайтуулсан хорь гаруйхан настай аваргын бэлгийг өөрчилж, хоёр өрөө байрыг нэг өрөө болгожээ.
Б.Батбаяр: ТИЙМ БУЛАЙ ЮМ ХИЙХГҮЙ
Бид тэнцвэртэй мэдээлэл хүргэхийн тулд Батлан хамгаалах яамны Бодлогын хэрэгжилтийг зохицуулах газрын тасгийн дарга, хурандаа Б.Батбаяраас тодруулга авлаа. Тэрбээр “Би олон жил ажилласан гэдэг утгаараа хүсэлт гаргаад байранд орсон. Тэр охины байрыг авчихсан юм байхгүй. Тийм булай юм хийхгүй. Шалгадаг газар нь шалгаад тодорхой болгоно биз. Тушаал шийдвэр гаргадаг хүн нь ч би биш. Сайдын тушаалд надад хоёр өрөө байр олгох тухай тодорхой биччихсэн байгаа” гэлээ.
С.ЦЭРЭНЧИМЭДЭД ХОЁР ӨРӨӨ БАЙР ӨГӨХ ҮҮ
С.Цэрэнчимэд яамнаасаа өгснийг нь л авч. Гэвч яаманд энэ тухай мэр сэр яриа гарч, ээж нь гомдолтой яваагаа мэргэжилтэнд хэлчихсэн нь бүүр цаад учрыг ухаж олоход тус болжээ. Өөрөөр хэлбэл, С.Цэрэнчимэдийн байр солигдсон нь буруу түлхүүр өгсөндөө биш, яамны мэргэжилтэн Д.Содномдорж, аваргын ээж хоёрын маргаанд биш сайдын тушаалын хавсралтыг дур мэдэн өөрчилсөнд байж. Сайдынхаа тушаалын хавсралтыг дур мэдэн өөрчилж, нутгийн хурандаадаа байр өгсөн гэх асуудлаар дэд сайдыг дотоод хяналтынхан нь шалгаж байгаагэх сурвалж мэдээлсэн. Хэрвээ Батлан хамгаалахын сайдын тушаалын хавсралтыг өөрчилсөн ньтодорхой болбол Ж.Цолмон сайд дахин тушаал гаргаж С.Цэрэнчимэдэд амласнаараа хоёр өрөө байр олгох боломжтойгэх сурвалж хэлсэн.
С.Цэрэнчимэд одоогоор байрандаа ороогүй байгаа. Тэрбээр манай сонинд “Байрны түлхүүр солигдсон асуудал үүссэн” гэдэг тайлбарыг өгсөн юм.
Ц.ӨРНӨХ
