УДЭТ-ын жүжигчин, найруулагч Б.Тамиртай эхлүүлсэн амрагийн харилцаа нь дээд сургуулиа төгсөөд удаагүй байгаа залуухан бүсгүйг хормын зуурт л олонд таниулж өгсөн гэлцдэг. Адтай залуугийн хайр халамжинд умбан экс эхнэрт нь хэвлэлээр “чичлүүлж” явахдаа ч толгой гэдгэр байхыг хичээж ирсэн жүжигчин Н.Мөнхсоёл өмнө нь мөн л гэр бүлийн амьдрал зохиож байсан нэгэн.
Тиймдээ ч жүжигчин Б.Тамирын охинд өөрийн хүүхдээс ялгаагүй хандаж, төрсөн эхээс нь дутуугүй хайрлана гэдгээ сэтгүүлчдэд мэдэгдэж байлаа. Гэвч түүний хүсэл талаар болж, амрагийн сонголт нь сохор байсныг оройтоогүй дээрээ ухаарсан Н.Мөнхсоёл энэ харилцаандаа шууд л цэг тавьсан гэдэг.
Харин одоо уран бүтээлийн ажил ихтэй яваа жүжигчин бүсгүй маань шинэ хайр дурлалтай хэдийнэ учраад амжсан гэдгээ олонд “тайлагнаад” авлаа. Царайлаг сайхан бүсгүйг өөрийн болгох хүсэлтэй олон аавын хүүгээс ялгарч чадсан тэрхүү нууцлаг залуу нь хэн болохыг тэр бүр хүмүүс мэдээгүй байгаа. Гэхдээ жүжигчин бүсгүй маань өнөөдөр гэнэтийн бэлэг авснаа задалж “Үнэхээр супер гэнэтийн бэлэг. Хайртдаа маш их баярлалаа. Дандаа баярлуулж, эрхлүүлж байдагт чинь хайртай шүү” гэж мэдэгджээ.
Б.Содон
