БОАЖЯ-наас цаг үеийн асуудлаар өнөөдөр 10.00 цагт мэдээлэл өгч байна.

-Богдхан дархан цаазат газарт ашиглалтын бус газар олголтыг цуцалсан тухай, -Ан агнуурын хуваарилалт, хэрэгжилтийн асуудлаар;
-Үерийн дараах хяналт, шалгалтын мэдээлэл, дүгнэлт; -Салбарын хяналт ба тодруулбал Архангайн Цэнхэрийн рашаанд хийсэн хяналт, шалгалтын мэдээг тус тус хүргэнэ.

Хэвлэлийн хурлаар дараах мэдээллийг өглөө:

-Идлэг шонхор шувуутай холбоотой буруу ойлголт иргэдийн дунд их байна. Идлэг шонхор шувууг соёлын зориулалтаар буюу гадаад орны өндөр дээд албан тушаалтанд хоёр орны дипломат харилцааг хөгжүүлэх зорилгоор бэлэглэдэг болсон.

Монгол орны нутагт идлэг шонхор шувууг барих, тээвэрлэх журмыг БОАЖ-ын сайд тушаал гарган, баталсан. Энэ журмын хяналтад орон нутгийн удирдлага хяналт тавих үүрэгтэй. 12 аймагт идлэг шонхор шувууны худалдаанаас 12 тэрбум төгрөгийг орлого олжээ. Энэ мөнгө Байгалийн нөөцийг хамгаалах санд төвлөрч, тухайн орон нутагт орлогын 50 хувийг буцаан олгодог. Энэ эх үүсвэрийг байгалийн нөөцийг хамгаалах, нөхөн сэргээхэд зарцуулах ёстой.

Байгалийн нөөцийг нөхөгддөг, нөхөгддөггүй гэж хуваадаг. Шонхор шувууг 26 сая төгрөгөөр үнэлсэн. Улсын тэмдэгтийн 1.3 сая төгрөгийг мөн төлдөг. Энэ шувуу манай улсад элбэг боловч бусад улсуудад ховор шувуу юм. Үржлийн үедээ Монголд нүүдэллэн ирдэг тул манай улсад элбэг. Дэд бүтэц, өндөр хүчдэлийн шонгийн моднуудын улмаас жил бүр 800-2000 идлэг шонхор шувуу үхдэг. Иймд Эрчим хүчний яамны Стандартын албатай хамтран стандартаа шинэчилсэн. Амьтанд ээлтэй шонгийн моднууд барьдаг болно. Гэвч шувуу үхсээр байна. Одоогоор найман аймгийн шонгийн моднуудыг шинэчилсэн. Эрчим хүч, БОАЖЯ, БХБ хамтран ажиллаж байна.

Амьтны тархац нутгийг хамтран хамгаалах шаардлагатай. Авто болон төмөр зам тавихдаа туурайт амьтан өнгөрөх боломжийг олгох ёстой. Намар хүрэн баавгай айлын хот руу орсон тохиолдлууд гардаг. Энэ нь тэдгээр амьтдын хоол хүнстэй холбоотой байдаг. Иргэд өмнөх жилүүдийн буюу хуучин зургийг олон нийтийн сүлжээнд түгээсэн байсан. Манай улсын малын тоо толгой өсөх хэрээр амьтны тархац нутаг хумигдаж байна. Иймд тухайн амьтан эргээд хүн мал руу дайрч, өөрийгөө хамгаалдгийг малчид анхаарах хэрэгтэй.