УИХ-аар 2015 оны төсвийн тодотгол, Төсвийн тогтвортой байдлын тухай зэрэг хуулийн төслүүд хэлэлцэгдэх үеэр хамгийн их маргаан дагуулсан нь өрийн тааз байлаа. Өрийн тааз гэж яриад байгаа нь өрийн дээд хэмжээ юм. Энэхүү өрийн таазыг манай улс төрчид хоёрхон сарын өмнө Дотоодын нийт бүтээгдэхүүний 49 хувьтай тэнцлээ гэж байв. Уг нь одоо мөрдөж буй төсвийн тогтвортой байдлын хуулиараа бол энэ нь 40 хувьтай байх ёстой. Гэтэл УИХ-ын Ж.Энхбаяр “Гадаад өрийн хэмжээ ДНБ-ний 58.3 хувьтай тэнцэж байна” гэсэн нь хардлага маргааны гол сэдэв болов. Ерөнхий сайд Ч.Сайханбилэг “Өрийн таазыг 70 хувь болгож байж л богино хугацаанд 40 хувьдаа эргэж очно” гэсэн нь бүр ч гал дээр тос нэмэх шиг боллоо. Түүнийхээр өрийн таазыг  70 хувьд тулгаж  нэмж өр тавих гэсэн санаа бололтой. Харин УИХ-ын олонх гишүүд ядаж 60 хувьд барихыг хичээх нь зөв хэмээн энэ хувь дээрээ тогтохоор болжээ. Гэвч Ц.Нямдорж гишүүн Ч.Сайханбилэг рүү “дайрч”,  “Та нар худал мэдээлэл оруулж ирлээ. Ийм нөхдөд хариуцлага хүлээлгэх хэрэгтэй. Эрүүгийн хуулийн 264-т заасан байдаг юм шүү. Бүр таван жилийн ялтай” гэж сануулж байлаа.  Тэгвэл тэрхүү худал мэдээлэл бэлтгэгч нь хэн байв.

Б.Баяр

Эх сурвалж: Tumen.mn