Үндэсний телевизийн мэдээний хөтлөгч гэдэг хэн дуртай нь хүсээд олдох алба биш. С.Чимгээ, Ч.Ичинхорлоо хоёр энэ амьдралынхаа турш тус телевизийн нүүр царай гэх тодотголоороо амьдарч байгаа гээд хэлчихэд хэтрүүлэг болохгүй. Цалин пүнлүү нь тийм өндөр биш ч асар том нэр хүнд, хүндлэл дагадаг алба гэсэн үг л дээ.

Тэгвэл орчин цагт хөтлөгч хүн хэрхэн мөнгө "босгож" болохыг харуулж яваа бүсгүй бол Д.Одзаяа. Фэйсбүүк, сошиал медиа хөгжсөн үе тул тэр хөтлөгч эгч нараасаа тод гялалздаг од болжээ. Хоол хийх, энд тэндхийн газрыг рекламдах, амралтаа хүртэл кино шиг өнгөрүүлэх, дэлгүүр хэсэх гэхчлэн түүний хийдэг бүхэн сонирхолтой байдлаар фэнүүдэд нь хүрдэг.

Хөдөлмөрч бүсгүй саяхнаас гэр бүлийн хүн дуучин Заяагийн хамтаар богино хэмжээний кино хүртэл хийж фэйсбүүкдээ тавих болов. Жинхэнэ од л ийм байдаг болов уу гэмээр түүний фэйсбүүк хамгийн хөгжүүлэлт сайтай хуудсаар тодроод байна.

Богинодоо 10, уртдаа 30-40 минутын мэдээ эфирт унших төдийхнөөр залуу нас, нүүр царайгаа "хайрцагласнаас" ингээд ч болов олонд хүртээмжтэй амьдрах юу нь буруу байх вэ.

Э.Эгдэрмаа