Хууль зүй, дотоод хэргийн сайд Х.Нямбаатар гэж нэг чиг үүргээ ч мэдэхгүй нөхөр байна,аа. Эсвэл сайдын зиндаанд тамга барьчихаад нууц задруулж суудаг хүн юм уу. Мэдэхгүй юм алга. Тагнуулын газар, Авлигатай тэмцэх газар, Цагдаагийн ерөнхий газар, Прокуророос өмнө аливаа зүйлийг мэдээлчихнэ. Сэжигтнээр татсан тухай мэдээлээд л олны өмнө гараад ирнэ. Монгол Улсын Хууль зүй, дотоод хэргийн сайдад үнэхээр хийх ажил олдохгүй байна уу. Ажлаа мэдэхгүй байна уу.

Хамгийн сүүлийн жишээ гэхэд Х.Нямбаатар “Эрүүгийн цагдаагийн газраас 2023.01.06-ны шөнө хойшлуулшгүй үйл ажиллагаа явуулж, Улаанбаатар төмөр замын Тээвэр зохицуулалтын газрын орлогч дарга С.Батдөлийг 48 цагийн хугацаагаар баривчилсан” гэх мэдээллийг өгөөд зогсож байх юм. Гэтэл тэр мэдээлэл худлаа байсныг албан ёсны байр суурь хэлсэн.

Үүнээс гадна шүүгчдийн дансанд асар их мөнгө байсныг тэр л мэдээлж байснаас цагдаа, тагнуулаас мэдээлээгүй. Нэг хүний гарт байгаа уул уурхайн лицензны тоог мэднэ, хэн хэдэн төгрөгийн үл хөдлөх хөрөнгөтэйг, хэний дансанд хэдэн төгрөг байгааг мэднэ, хэний гэрээр хэн орж гардгийг ч мэднэ. Түүнд мэдэхгүй зүйл гэж байхгүй. Өглөө яамаараа орчихоод өдөр цагдаа, тагнуул дээр ажилладаг байх. Тэгээд шөнө нь эргүүлийн цагдаа ч хийдэг байж мэдэх нөхөр. Уг нь Хууль зүй, дотоод хэргийн сайдын хувьд яам юм уу, Төрийн ордонд үндэсний аюулгүй байдал, дотоод нөхцөлд тулгарч буй аюулаас хэрхэн урьдчилан сэргийлэх талаар бодлого боловсруулж суух ёстой. Хамгийн наад зах нь дотоод гадаад хүчин зүйлээс хамгаалж байгаа хүчний байгууллагын алба хаагчдынхаа ахуй амьдралд санаа тавьж байх ёстой биз дээ. Гэтэл өдөр шөнөгүй мэдээлэл хийгээд л гүйж явах юм. Эсвэл өөрийгөө эргүүлийн цагдаа гээд бодчихсон нөхөр байх.

Tumen.mn