Хөгжлийн Банкны гэх хэргийн гэм буруугийн шүүх хуралдаан Улаанбаатар чуулгын байранд 13 дахь өдрөө үргэлжилж байна.
Өнөөдрийн шүүх хуралдаанаар "НВЦ" ХХК-ийн холбоотой асуудлаар шүүгдэгчээс асуулт асуув. Энэ үеэр "НВЦ" ХХК-ийн захирал Ц.Баатарбилэгээс “хахууль өгөх”, “мөнгө угаах” гэсэн яллах дүгнэлтийн дагуу н.Мөнгөншагай прокурор асуулт асуулаа.
- Та "НВЦ" ХХК-ийн захирал, хувьцаа эзэмшигчээр явж байгаа юу?
- Тийм ээ.
- Хөгжлийн Банкны ТУЗ-ийн дарга Б.Даажамбад 2017 оны аравдугаар сарын 11-нд нэг сая 440 мянган төгрөгийн үнэ бүхий хэтэвч хахуульд өгсөн гэх үйл дээр яллаж байгаа. Мөрдөн шалгалтын явцад Б.Даажамбын орон байранд таны худалдаж авсан хэтэвч илэрсэн байдаг. Таны худалдаж авсан хэтэвч яагаад Б.Даажамбад очсон бэ?
- Миний бие Б.Даажамбатай уулзаж байгаагүй. Тэр хэтэвчийг өгч байгаагүй. Энэ танхимд л анх харж байсан.
- Ганжаргал гэх хүн таны жолоочоор ажиллаж байсан уу?
- 2016-2018 оны орчимд ажиллаж байсан. Хөгжлийн Банкнаас зээл авахад миний жолоочоор ажиллаж байсан.
- Таныг УИХ-ын гишүүн Ё.Баатарбилэгт жолоочоороо дамжуулж 100,000 ам.долларын хахууль өгсөн хэмээн буруутгаж байгаа. Энэ талаар холбогдох нэр бүхий гишүүд мэдүүлдэг. Гэрчүүдийн мэдүүлгийг яаж няцааж байгаа вэ?
- Үүнийг 100 хувь үгүйсгэж байгаа. УИХ-ын гишүүн Ё.Баатарбилэгт мөнгө өгч байгаагүй. Жолооч гүтгэж байна хэмээн ЭЦГ, АТГ-т хандсан боловч шалгаагүй. Миний энд зогсож байгаа шалтгаан бол дээрх хэрэг байж магадгүй.
Хорьж саатуулах явцдаа энэ асуудлыг л ярьсан. 70 хоногийн турш нэг сая доллар өгсөн гээд хэлчих тэгвэл чамайг эндээс гаргалаа гэдэг байсан. Тухайн үедээ эрүүдэн шүүх асуудал гарсан.
92 хоног хоригдсон. 70 гаруй хоног дээрээ жолоочийг дуудаад үүнийг бичиж аваад эрүүгийн хэрэг үүсгэсэн.
- Мөрдөн шалгах ажиллагааны явцад өгсөн мэдүүлгээр Хөгжлийн Банкны гүйцэтгэх захирал Б.Батбаяр, дэд захирал Ч.Мөнхбаяр нартай ойр харилцаа байсан уу?
- Б.Батбаяр захирлыг танихгүй, нэрийг нь сонсож байсан. Ч.Мөнхбаяр захирлыг бол танина. Маргаж буй, хүлээн зөвшөөрөхгүй байгаа. УИХ-ын гишүүн Ё.Баатарбилэгт мөнгө өгөх, ТУЗ-ийн дарга Б.Даажамбад хэтэвч өгөх, мөнгө угаах гэсэн гурван зүйл дээр хариулт өгнө.
