Монос групптэй холбоотой бас нэгэн ноцтой хэрэг гарсан байна. Тодруулбал, ЭХЭМҮТ-д гэрээгээр эм нийлүүлдэг Монос группийнхэн эмчийн жорын дагуу Ланадексон эмийг нийлүүлэх ёстой атал андууран Ланасорбид эмийг нийлүүлснээс тус эмнэлэгт хэвтэн эмчлүүлж байсан найман хүүхэд хордлогод орсон талаар эх сурвалж мэдээлж байна.
Ланадексон эмийг харшил, амьсгалын замын болон арьс, цусны өвчний үед хүүхдэд хоолны өмнө хоногт дунджаар 0.0833-0.333 мг/кг-аар сүүгээр даруулж уулгах заавартай аж. Харин Ланасорбид эмийг зүрхний архаг дутмагшлийн үед 10-20 мг-аар өдөрт 2-3 удаа бусад эмтэй хавсран хэрэглэдэг аж.
Гэтэл харшлийн зориулалттай эмийн оронд зүрхний өвчний эсрэг үйлчилгээтэй эм уусан хүүхдүүдийн биед тэр даруйдаа өөрчлөлт орж, хордлогын шинж тэмдэг илэрч эхэлсэн гэнэ. Харин энэ үед тус төвийн эмч нар хүүхдүүдийг өөр төрлийн эм уусан болохыг мэдэж, яаралтай арга хэмжээ авснаар хордого хүндрэхээс сэргийлсэн байна.
Энэ асуудал үүссэний дараа Монос группээс холбогдох албан тушаалтууд нь тус эмнэлэгт ирж эмч нар болон хүүхдүүдийн эцэг эхээс уучлал гуйжээ.
Одоогоор эмийн хордлогод орсон найман хүүхдийн гурав нь эмнэлэгээс гарч, таван хүүхэд нь үргэлжлүүлэн эмчлүүлж байгаа гэх мэдээлэл байна.
Фенобарбитал эмэнд хордсон зарим хүүхэд оюуны хомсдолтой болжээ
Өнгөрсөн оны наймдугаар сард мөн “Монос эх нялхас” эмийн сангийн жор баригч Б.Эрдэнэчимэг нь өнгөрсөн “Фенобарбитал” эмийг эмчийн жороор нярай хүүхдүүдэд олгохдоо том хүний тунгаар олгосноос болж 16 нярай хордож, эмчлүүлж байсан юм. Мөн “Монос-Улаанбаатар” компаний лавлахын эмч Д.Жавхлантөгс нь утсаар “Фенобарбитал” эмийг хэрэглэх зааврыг иргэдэд мөн буруу өгснөөс дахин хоёр нярай хордох шалтгаан болсон гэдгийг хууль хяналтын байгууллагаас тогтоогоод буй.
Дээрх хоёр ажилтны буруутай үйл ажиллагаагаас болж эмэнд хордсон гэх 16 нярайн биеийн байдал өнөөдөр сайнгүй, шинжилгээнийх нь хариу муу гарсан талаар тэдний ар гэрийнхэн мэдээлж буй. Өнгөрсөн нэгдүгээр сард Фенобарбитал эмэнд хордсон 10 хүүхдийг ЭХЭМҮТ-д шинжилгээнд хамруулахад эмийг уух үед хамгийн бага буюу тав хоногтой байсан хүүхдийн шинжилгээний хариу оюуны хомсдолтой, тархины шохойжилттой, саажилттай гэж гарсан бол гурван хүүхэд тархины усжилттай, хоёр хүүхэд элэгний өөрчлөлттэй гарчээ. Түүнчлэн эмэнд хордсон бүх хүүхэд харшилтай, тархины дараллтай гэж гарсан байна.
Эл хэрэгт холбогдуулан Дүүргийн эрүүгийн хэргийн анхан шатны шүүхээс “Монос эх нялхас” эмийн сангийн жор баригч Б.Эрдэнэчимэгт хоёр жилийн хорих ял оноож, тэрбээр жирэмсэн байгаа тул хорих ялыг хоёр жилээр хойшлуулсан. Мөн “Фенобарбитал” эмийг хэрэглэх зааврыг иргэдэд утсаар буруу өгснөөс болж хоёр нярайг хордуулсан гэх “Монос-Улаанбаатар” компанийн лавлах эмч Д.Жавхлантөгсөд нэг жилийн хорих ял оноож, ялыг тэнсэх шийдвэрийг гаргасан юм.
Эх сурвалж: Tumen.mn
