Монголд койны халуурал эхлэхэд хүмүүс гэмт хэрэг үйлдэж мөнгө олон оруулж байсан аж. Энэ талаар сэрэмжлүүлэхэд “Сайн ломбард”-ын Хархорин салбарын эрхлэгчээр ажиллаж байсан А, М нар нь хуурамч шаргал өнгийн метал гинж, бугуйвч зэргийг “Хар хорин” худалдааны төвөөс худалдан авч, бичиг баримтаа хаяж гээгдүүлсэн иргэдийн иргэний үнэмлэх болон бусад бичиг баримтыг ашиглан, зээлийн гэрээ байгуулан байгууллагад их хэмжээний буюу нийт 186.4 сая төгрөгийн хохирол учруулан гэмт хэрэгт холбогджээ. Шүүгдэгч А нь “... Би 2019 оны 6-р сард Хар хорин салбарын эрхлэгчээр томилогдон ажиллах болсон. Ажиллах явцдаа Ард апплейкшинээс авсан зээлээ төлж чадахгүй удаан явж улмаар муу зээлдэгч гэсэн ангилалд орох гээд байсан тул хуурамч эд зүйлийг өөрийн ажилладаг ломбарддаа тавьж эхэлсэн. Мөн тухайн үед койн гэдэг гарсанд ашиг олж өрөө төлөхөөр шийдэн “Хархорин” худалдааны төвөөс хуурамч шаргал өнгийн хүзүүний гинж, бугуйвч аваад хажуу талд ажилладаг, зүс таньдаг хүмүүсээр хаясан, гээсэн баримт бичиг бариулж оруулан зээл авч эхэлсэн. Авсан мөнгөө 4-5 төрлийн койн руу хуваагаад хийсэн. Хүмүүсийн хаясан гээсэн бичиг баримтыг ТҮЦ-нээс 2000-3000 төгрөгөөр авдаг. Тухайн үед шалгалт ирэхэд нь цахим сан дээрхи хуурамч эд зүйлийнхээ гэрээг программ дээр хаагаад шалгалт явахаар сэргээлгэдэг байсан. Тэгээд л илрүүлж чаддаггүй байсан” гэжээ . Харин М нь “ ... 2021 оны 11-р сараас хуурамч эд зүйлсийг хажуу талын үсчин нараар дамжуулан тавьж эхэлсэн. Койнд ороход ашигтай байж магадгүй гээд дахиж хуурамч эд зүйл ломбардад тавиад мөнгийг нь койнд өгдөг байсан. Дандаа гинж бугуйвч тавьдаг байсан. Яагаад гэвэл дараа нь шалгалт ирвэл ялгаж авахад амар гэж бодсон. Бид хоёр нийт 186.4 сая төгрөгийн зээл гаргуулан авсан ...” гэжээ. Койнд А нь 50 сая, М нь 46 сая төгрөг оруулаад алджээ. Шүүх тэдэнд 3-4 жилийн хорих ял оноосон байна.
