МАН-аас Нийслэлийн иргэдийн төлөөлөгчдийн хуралд сонгогдсон "Мишээл групп"-ийн захирал Б.Энх-Амгалан ОХУ-ын Новосибирск хотод зохион байгуулагдах Улаанбаатарын эдийн засаг, соёлын өдрийн үйл ажиллагаанд оролцохоор Улаанбаатар-Москва-Берлин чиглэлийн МИАТ-ын онгоцыг гурван цаг саатуулж, чиглэл өөрчлүүлж, Новосибирскт буусан тухай мэдээлэл цацагдаад буй.
Тодруулбал, хуралд оролцохоор хөдөлсөн гучин хүний бүрэлдэхүүнд Нийслэлийн Засаг дарга бөгөөд Улаанбаатар хотын захирагч Э.Бат-Үүл, тэргүүтэй дандаа хотын удирдлага, албан тушаалтнууд явсан гэх мэдээлэл тархаад буй юм.
Тэгвэл энэ талаар МИАТ-ийн зүгээс “Энэ бол төлөвлөгөөт нислэг байсан. НЗДТГ-ын хүсэлтийг бид есдүгээр сарын 17-нд албан ёсоор хүлээн авсан. Новосибирскт бууж байгаатай холбогдуулан нислэгийн цаг сунжирсан. Энэ талын зөвшөөрлийг бид таван улсын иргэний нисэхийн байгууллагуудаас есдүгээр сарын 29 гэхэд авсан байгаа. ОХУ-аас ирсэн зөвшөөрлийн дагуу бид Новосибирск хотод нэг цаг зогсох ёстой байсан.
Гэтэл аравдугаар сарын 2-ны орой бидэнд мэйл ирээд онгоцыг хил гаалийн үзлэгт оруулах шаардлага гарсан тул хоёр цаг зогсоосон” гэх хариултыг өгсөн бол Нийслэлийн Засаг дарга бөгөөд Улаанбаатар хотын захирагч Э.Бат-Үүл "Новосибирск явсан ч дээрх хүмүүстэй уг онгоцоор яваагүй" гэдгээ илэрхийлсэн байна.
Гэвч энэ талаар Зам тээврийн сайд М.Зоригт хатуухан байр суурь илэрхийлж "МИАТ компани урьдчилан мэдэгдэлгүйгээр ийм асуудал гаргасан. Иргэн хүн МИАТ компанийн билет худалдаж авснаар МИАТ компанитай эрх зүйн харилцаанд орж байгаа. МИАТ компани билетээ борлуулснаар гэрээний дагуу үүрэг хүлээдэг. Ямар нэгэн саадгүй, аюулгүй шууд хүргэж өгнө гэсэн үүрэг хүлээчихээд, далимд нь найзыгаа өөр хотод хүргэж өгнө гэдэг зохисгүй явдал. Гэрээгээ зөрчсөн явдал. Үүнтэй холбогдуулаад МИАТ-ийн удирдлагад хариуцлага тооцно. ТУЗ-ийг нь хуралдуулах арга хэмжээ авна" хэмээн мэдэгдээд амжлаа.
Гэвч эндээс нэг л зүйл харагдаж байгаа нь, Монголын Улсын иргэний агаарын тээвэр бүхэлдээ ялзарч, ганц Иргэдийн хурлын төлөөлөгчөөр чиглэл, цагаа заалгуулж, төлөвлөөгүй нислэг хүртэл үйлддэг болжээ.
Х.Маргад
