Тэнхимийн С.Дэмбэрэл ИЗНН, төрийн түшээ гэсэн малгайтай хэдэн жил малилзлаа. "Хоцорсоон? Би угаасаа хоцорды ш дээ" хэмээн нэгэн телевизийн сэтгүүлчид хайнгадуухан хариулснаар С.Дэмбэрэл гэдэг хүн парламентэд суудгийг иргэд мэдсэн билээ. Хэсэгтээ л трэнд болж олны ам дамжин явсан нэг ч гэсэн үг, хэллэгтэй байна гэдэг хэн ч танихгүй сураггүй "баачка" байснаас нь дээр л дээ.
За тэр "ойрд хүүхэндсэнгүй" гэдэг жиргээг яриад ч яахав. Худалдаа аж үйлдвэрийн тэнхим толгойлж явсан тун төлөв байрын имиж нь гишүүн болуут бусдадаа уусан алдагдсан, ам нь халахаараа задгайрдаг болсон байж мэдэх юм.
Энэ сонгуулиар ИЗНН гэдэг нам сонгогчдын цэсэнд байхгүй болох шахсны буруутанг түүнийг гэлцэх юм билээ. Барагтай бол хөнгөн хөдөлдөггүй С.Оюун намаараа АН-ыг дэмжихээ илэрхийлж өөрөө нэр дэвшээгүй нь Дэмбээгийн шахалт ч байж болзошгүй.
Мань эр хэдийгээр "хоцромтгой" ч улстөрд урваж шарвах асуудал дээр бусдаас хоцроод байдаггүй нэгэн гэдгээ энэ удаад ч бас харуулж С.Оюунаас өрсөж АН-аас нэр дэвшигчийн мандатаа гардсан. Чингэлтэй дүүргийн 63 дугаар тойрогт өрсөлдөх болсон түүнийг намаасаа урвасны шагналд энэ тойргийг авсан гэх. АН-ын дарга З.Энхболдын тухайд С.Дэмбэрэлийг "Хашир бурхи ялалт авчраарай" хэмээн урамшуулаад явуулсан байж таарна.
Гэтэл яван явсаар Дэмбээ маань АН ч үгүй, ИЗНН ч үгүй, УИХ ч үгүй хоцрох вий дээ хэмээн хэзээд үнэнчээр дэмжигсэд нь түгшингүй суугаа гэнэ дээ.
Х.Онон
