нийтлэсэн Admin

Өчигдөр үдээс хойш 15.20 минутын үед “Метро маll” их дэлгүүрийн урд байрлах “Хаан гэр” ресторанд гал гарсныг бид мэдээлсэн. Тухайн үед гал унтраах зургаан баг ажиллаж байсан боловч тус барилга сэндвичэн учраас оройны 18.00 цагт гал улам бүр даамжирч хажуу байрнууддаа нөлөөлөх хэмжээнд хүрсэн юм. Галын өтгөн хар утаа хотын төв болон ойр орчныг бохирдуулж, ойролцоох байр луу гал нөлөөлөх магадлалтай байсан тул оршин суугчдыг аюулгүй байлгах үүднээс яаралтай байрнаас нь гаргаж байлаа. Мөн “Хаан гэр” болон “Хаан караоке”, “The bull” зэрэг байгууллагуудад шар айраг, согтууруулах ундаа ихээр хадгалагдаж байсан нь гал унтраах явцад ихээхэн хүндрэл учруулж буйг албаны хүмүүс хэлж байсан юм. “Хаан гэр” ресторан нууцаар зориулалтын бус газар пиво үйлдвэрлэх тоног төхөөрөмж, түүхий эдийг байрлуулснаас үүдэн гал гарсан гэдгийг зарим эх сурвалжууд хэлж байсан юм.

“Хаан гэр”: Барилгын стандарт зөрчиж баригдсан

Мөн “Хаан гэр” ресторан анх баригдаж эхлэхдээ стандартын бусаар барилгаа барьж эхэлжээ. Энэ бүхнийг нь “Хаан караоке” гэх хаягтай ягаан гурван давхар барилгыг эзэмшдэг иргэд Мэргэжлийн хяналтын ерөнхий газар болон холбогдох албан тушаалтнуудад удаа дараа бичиг явуулж барилгын ажлыг зогсоож өгөхийг хүсдэг байжээ. Өөрөөр хэлбэл, Монгол Улсын барилгын норм ба дүрэм, Орон сууцны барилгын зураг төсөл төлөвлөлтөд 2-4 давхар барилга хоорондын зай хамгийн багадаа 15 метр байх ёстой гэж заасан байдаг. Таваас найман давхар бол барилга хоорондын зай 21 метр, есөн давхарт 32 метр, 12 давхарт 45 метр, 16 хүртэл бол 62 метрийн зайтай байна гэх стандарт мөрдөгдөж байгаа. Тэгвэл энэ бүхнийг зөрчсөн байжээ.

“Модерн Номадс”-ын сүлжээ ресторануудын нэг гэдгийг эх сурвалж онцлов. “Модерн Номадс”-ын цаад “эзэн”-ийг УИХ-ын гишүүн С.Баярцогт гэдэг. Сүлжээ ресторануудын эзэнийг М.Есөнмөнх. Тэрбээр монголын тэргүүн 100 баяны жагсаалтын 82 дугаарт 20 сая ам.долларын хөрөнгөөрөө жагсдаг. Ийм эрх мэдэлтэй хүмүүс “Хаан гэр” рестораны ард байдаг учраас Мэргэжлийн хяналт болон бусад төрийн байгууллагууд хөдөлдөггүй гэдгийг эх сурвалж дурдлаа.

“Хаан гэр”-т гарсан галын шалтгаалыг тодруулахаар ажиллаж байна. Урьдчилсан байдлаар караокенаас гал алдсан гэх таамаг байна.