УИХ-ын гишүүн Х.Тэмүүжин “Дорлигжавын хэрэгсэхгүй болгуулсан хурандаа нарын хэргийн цаана их юм бий” хэмээн баримт дэлгэлээ. Тус баримтад тухайн үед Г.Сарангэрэлийн өмгөөлөгчөөр ажиллаж байсан Г.Батбаяр өмгөөлөгч рүү утсаар ярьсан утасны бичлэг болон Цагдаагийн ерөнхий газрын даргын 2014 оны наймдугаар сарын 29-ний өдрийн даргын зөвлөлийн хуралдааны тэмдэглэлээс хэсэгчилж оруулсан байна. Дээрх баримтын талаар Х.Тэмүүжин гишүүн “АТГ, тагнуул хоёр төрийн нууц гээд дарчихсан. Дорлигжав Ерөнхий прокурор байхдаа хэрэгсэхгүй болгосон баримтуудыг задлах хэрэгтэй”, Бүх булхайгаа төрийн нууц гээд дарчихсан, юу ч гэж ярьж болно гэж бодож буй бол Дорлигжавтай нь цуг шалгуулж болно”, “Хаалттай хуралдаанд нууц гэж хэлсэн зүйл сарын өмнө хэвлэлээр өөрсдөө тарааж, бичүүлсэн зүйл. Нууцлаад байх юмгүй” гэх зэргээр жиргэсэн юм. 
    Тэгвэл энэ хэргийн талаар тухайн үед Эрүүгийн цагдаагийн газрын даргаар ажиллаж байсан Н.Ууганбаяр хурандаа хэвлэлд өгсөн ярилцлагадаа “Хар тамхины хэрэг илэрсэн. Сэжигтнүүдийг саатуулж, шалгалтын ажиллагаа явагдаж байсан. Гэтэл энэ хэрэгт холбогдсон  эмэгтэйчүүд  Х.Тэмүүжин сайдын талаар байцаалтад мэдүүлэг өгч эхэлсэн. Энэ үед гэнэт сайд өөрөө  “ЦЕГ-ын дарга Б.Билэгт үл бүтэх хүн учраас дор нь байгаа хүмүүс над дээр гүйцэтгэх ажил явуулж байна”, “Цагдаагийн байгууллага сайд дээрээ гүйцэтгэх ажил явууллаа” гэх утга бүхий ярилцлагуудыг хэвлэл мэдээллийн хэрэгслээр өгч эхэлсэн. Баригдсан хүмүүс ч ямар ямар бодис хэрэглэсэн гэдгээс эхлээд бас бус зүйлс нь тогтоогдож байсан.Хууль зүйн сайд хар тамхитай холбоотой асуудалд холбогдсон тухайд ч биш бүр хувийн харилцааныхаа тухай асуудлуудыг мэдүүлж эхэлсэн.  Асуудал ердөө л  энэ хүрээнд байсан. Сайдын мэдээлэл гомдлоор,цагдаагийн байгууллага түүнийг мөрдөж мөшгөсөн эсэхийг нягтлахаар Тагнуулын ерөнхий газар, Прокурорын байгууллага тус тусын чиглэлээр шалгаж, хууль бус  ажиллагаа явуулаагүй болохыг тогтоосон. 
Г.Сарангэрэлийн өмгөөлөгч рүү утасдсан гэх бичлэгт миний нэрийг дууддаг.  Тэгэхээр тэр бичлэгийг хаана ч хэн ч хийж болох байгаа биз.Харин энэ бичлэгийг хэн, ямар зорилгоор, хаана яах гэж хийв, яагаад тэгээд олон нийтэд цацав гэдгийг шалгах ёстой. Шалгаж, тогтоож, нотолж болно. Чадна. Гэвч бидэнд энэ ажиллагааг хийх боломж олголгүй албанаас  халсан” гэх хариултыг өгсөн байдаг юм.