Үе үеийн Засгийн газар “100 дахь хоног” хэмээн ажлаа тайлагнадаг. Гэтэл Хагас жил гаруйн хугацааг тулаад буй Л.Оюун-Эрдэнийн Засгийн газар “200 дахь хоног” хэмээн ажлаа тайлагнав. Үнэндээ тайлагнаад байх ч ажил амжуулаагүй Засгийн газрыг “200 хоног” гээд хийсэн ажилгүй сууж байгааг харсан олон нийт “Хоногоо хүлээж байгаа Засгийн газар” хэмээн нэрийдэж байна.

Үнэн хэрэгтээ Л.Оюун-Эрдэнийн Засгийн газарт тайлагнаад байх ажил гэж юу байхав, У.Хүрэлсүхийн үед бүтээсэн, босгосон, босгохоор төлөвлөсөн ажлуудыг л ярих байх. Өөр ч арга байхгүй. Тодотгож хэлбэл өдгөөгийн Ерөнхий сайд маань жигд ажиллаж байгаа машины залуур дээр ямар ч асуудалгүй ирээд суучихсан л хүн. Харин хагас жил гаруйн хугацаа өнгөрөхөд жигд ажиллаж байсан машины зарим эд анги муудаж эхэлжээ. Шатахуун, түлшний үнэ огцом өсөж, үүнийг даган өргөн хэрэглээний бараа бүтээгдэхүүний үнэ ч өсөв, ядуурал ч нэмэгдэв. Нийгмийн бүтцийн хувьд аваад үзэх юм бол хөдөлгөх гол хүчин зүйл болох мотор муудаж эхэлсэн гэсэн үг. Л.Оюун-Эрдэнийн Засгийн газрын хийсэн ганцхан ажил гэвэл “10 их наядын хөтөлбөр” гээчийг баталж, мөнгө хэвлэсэн. Үүний хор уршгийг ард түмэн хүртэж эхлээд байгаа нь энэ юм.

Саяхан гэхэд хоёр тэрбум шахам төгрөг зарцуулан барьсан “Андлалын өргөө” гэх зүйлийг нь нурааж байна. Эрхэм Ерөнхий сайд маань өвөөгийнхөө төрсөн бууцан дээр “Андлалын өргөө” нэртэй шавар босгож, “жилд 400 сая жуулчин хүлээн авна” гэсэн цагаас хойш шүүмжлэл дагуулж байсан шавар тоосгыг өнөөдөр нурааж байгаа юм. Хийх ажилгүй Ерөнхий сайд маань өмнө нь овоолсон шавраа өнөөдөр нураах зэргээр ажил явуулж байгааг та бүхэн харж байна. Нөгөө талаар МАН-ын дэргэдэх НАМЗХ дотроо бужигнаж эхэлсэн, үүний цаана МАН-ын том том фракцууд засгийн эрхэнд гарахааар хөдөлж байгааг харуулсан хэрэг. Энэхэн жишээн дээрээс харахад ёстой л “Хоногоо хүлээж буй Засгийн газар” гэхээс ч өөрөөр яах билээ.

Нэргүй

Түмэн.мн