Төв талбайд жагсаж байгаа иргэдийг Ерөнхий сайд, Засгийн газрын гишүүд хүлээн авч, уулзаж байна.

Ерөнхий сайд Л.Оюун-Эрдэнэ "Өчигдөр гарч ирэхийг их хүссэн. Өнөөдөр миний хувьд амаргүй дүрэм журмыг давж гарч ирлээ. Та бүхний бухимдаж байгаа олон зүйлийг өөрчлөхийн төлөө хичээж байгаа.

Би уучлал гуйя. Та бүхэн намайг уучлаарай.

Тодорхой шалтгааны улмаас тодруулга авах ёстой хүмүүсийг саатуулсан гэх мэдээллийг Хууль зүйн сайд өгсөн. Өнөөдрийн байдлаар нэг ч саатуулагдсан хүн үлдээгүй. Засгийн газарт болж байгаа зүйл ч байна, болохгүй байгаа олон зүйлс ч байна. Бид бүгдээрээ хамтдаа хичээх нь чухал.

Ажил үүргээ гүйцэтгэж байгаа цагдааг хүндэтгэх ёстой шүү, залуус аа. Жагсаалын урд Ерөнхий сайд нь шууд гарч ирээд байх улс орон олон биш. Тиймээс өнөөдөр хамтдаа хэдүүлээ шийдэл ярих ёстой. Ингэвэл олон зүйлийг өөрчилж чадна. Бухимдаж байгаа олон зүйлийг өөрчлөхийн төлөө хичээж байгаа.

Үнэ өсөж байна. ОХУ, Украинд мөргөлдөөн гарч байна. Бензиний үнэд зохицуулалт хийх гээд хууль өргөн барьчхаад байж байна. Та бүхнийг ийм бухимдалтай байлгаж байгаадаа уучлал гуйж байгааг минь хүлээж авна уу.

Хамтарч ажлын хэсэг гаргаад ажиллаж болно. Авлигал, хээл хахуульд холбогдсон улс төрчдийн ялын бодлогыг чангалах гэх мэт асуудлаар шаардлагууд өгсөн байна. Хөгжлийн банк, Оюутолгойн асуудалд ч тэр Засгийн газар та бүхэндтэй адил байр суурьтай байна.

Үнэ өссөн байгаа нь үнэн. Засгийн газар УИХ-д хууль оруулчихсан. Энэ долоо хоногт багтаад батална гэдэгт итгэлтэй байна. Ингэснээр 1000 төгрөгөөр өсөх бензиний үнийг тогтвортой барина. Бид бензин үйлдвэрлэдэггүй учраас амар биш гэдгийг ойлгох ёстой. Гэхдээ үнэ буулгахын төлөө чадах бүх зүйлийг хийх болно гэдгийг амлаж байна. Энэ бүхэн тийм амар биш шүү. Засгийн газар ид шидтэн биш шүү гэдгийг ойлгох ёстой" гэв.