Чадварлаг хоолой, уянгалаг дуугаараа залуусын хайр хүндлэлийг хүлээж байгаа дуучин бол А.Түмэн-Өлзий. Тэрбээр жүжигчин Л.Сөрөлттэй хамтарч уран бүтээл туурвиж байгаа төдийгүй ирэх сарын 9-нд “Хайрын тэнгэр диваажин” тоглолтоо хийхээр бэлтгэж байгаа юм. Энэхүү тоглолтын үеэр дуучин А.Түмэн-Өлзий бага сага жүжиглэж үзүүлэх бололтой. Мөн тоглолтод “Шинэ үе” продакшн, дуучин П.Баярцэнгэл, Э.Төрмандах, О.Гансувд, “Маршал” хамтлаг гээд олон уран бүтээлч оролцох юм байна. 






Тэгвэл дуучин А.Түмэн-Өлзий өөрийнөө тоглолт бол хийж байгаа уран бүтээл, хувийн амьдралынхаа талаар хэвлэлд ярилцлага өгчээ. Тэрбээр дан уртын дуунаас бүтсэн цомог гаргахаар төлөвлөж байгаа аж. Түүнээс гадна “Хөх Монгол” хэвлэлийн компанийн захиралтай цахим ертөнцөөр “дайтсан” талаараа ч ярьсан байна. 

“Тухайн үед “Хөх Монгол” хэвлэлийн компанийн захиралтай ярилцаад, миний тоглолтыг ивээн тэтгэхээр болсон юм. Тус компани миний 21 аймгаар аялан тоглолт хийх талаарх мэдээлэл бүхий сурталчилгааны самбарыг бэлэн болгочихсон байсан. Би яг маргааш нь Архангай аймгаас тоглолтоо эхлэх гээд бүх бэлтгэлээ хангачихсан хөдлөхөд л бэлэн байлаа. 

Гэтэл орой нь надад тэр хүнээс “Хоёулаа илүү дотно харилцаатай баймаар байна” гэсэн утгатай мессеж ирсэн. Юу вэ, маргааш нь миний тоглолт эхлэх гэж байхад ийм юм ирэхээр ёстой гайхана биз дээ. Үнэндээ шоконд орсон. Голдоо ортол гомдсон. Урлагийн хүмүүст тоглолтын ивээн тэтгэгч хамгаас чухал. Үүнд дөрөөлж хүнийг тэгж шантаачилж болохгүй биз дээ. Би чинь бас хүн шүү дээ.

Хүнд дээрэлхүүлээд, доромжлуулаад баймааргүй санагдсан. Тэгээд фэйсбүүкт мессежийг нь тавьсан. Гэхдээ өөрөөс нь асуулгүй тавиагүй. Та надад ингэж хандаж байгаа бол би таны мессежийг олон нийтийн сүлжээгээр цацлаа шүү. Эхнэр чинь харна биз хүртэл хэлсэн. Тэгсэн өөдөөс “Асуудалгүй, илүү олон хүнд түгээ” гэсэн. Тухайн үед шар хөдлөөд фэйсбүүкт тавьчихсан. Гэхдээ таван минут болоод л хүний мууг үзээд яахав дээ гэж бодоод устгах хооронд олон хүнд хүрчихсэн байна лээ” хэмээн ярьжээ. 

Н.Болд