Манжуур, Эрдэнэт хотууд ах дүүсийн харилцаат хот бөгөөд өнгөрсөн бямба гарагт буюу 2015 оны аравдугаар сарын 10-нд Манжуур хотын төлөөлөгчид Эрдэнэт хотод ирж ажил хэргийн уулзалт хийжээ. Уулзалтыг Орхон аймгийн ЗДТГ-аас зохион байгуулж бямба гаригийн орой “Сэлэнгэ” амралтын газарт хүлээн авалт зохион байгуулсан байна.

Хүлээн авалтад Орхон аймгийн ИТХ-ын дарга Б.Мягмарсүрэн, Орхон аймгийн МАН-ын хорооны дарга, аймгийн ИТХ-ын тэргүүлэгч Б.Батлут, МАХН-ын хорооны дарга, ИТХ-ын төлөөлөгч Т.Оюунцэцэг, аймгийн ИТХ-ын  тэргүүлэгч Р.Рагчаа, аймгийн ИТХ-ын тэргүүлэгч Ж.Ганчимэг нарыг урилгаар оролцуулсан аж.

Энэхүү арга хэмжээ ид үргэлжилж байтал “Эрдэнэт Секьюрити” харуул хамгаалалтын албаны дарга Эрдэнэбат согтуу орж ирж хүлээн авалтын үйл ажиллагааг үймүүлж танхайрчээ. Тэрбээр аймгийн МАН-ын хорооны дарга, аймгийн ИТХ-ын тэргүүлэгч Б.Батлутыг барьж авч цохихдоо бултахад нь унаж ухаан алдсан байдалтайгаар эмнэлэгт хүргэгдсэн байна.

 Одоогоор Эрдэнэбатын биеийн байдал хүнд, харин Б.Батлутыг харьяаллын дагуу Булган аймгийн Цагдан хорих ангид саатуулан шалгаж байгаа аж. Эх сурвалжийн мэдээлснээр түүнийг аргагүй хамгаалалт хэтрүүлэн бусдын бие мах бодод гэмтэл учруулсан байж болзошгүй гэдэг үндэслэлээр шалгаж байгаа бололтой.

Г.Норов