МУГЖ, дуучин Ч.Бат-Эрдэнэтэй таван жил хамт амьдарсны эцэст өөрийн замыг эргэлт буцалтгүйгээр сонгосон дуучин Э.Оюумаа өдгөө ганц бие яваа. Нэгэн цагт хайрлан дурлаж явсан дуучин амраг нь хуучин эхнэр, хүүхдүүд дээрээ эргэж очсон ч тэрбээр уран бүтээлээс өөр зүйлд анхаарал хандуулалгүй, толгой гэдгэр алхаж буй гэлцдэг. Харин сүүлийн үед дуучин бүсгүйг өнгөрсөн хугацаанд өөрт нь хайрлаж дурласан залуусын захидлаар ном гаргах гэж байгаа тухай мэдээлэл хэвлэлээр цацагдах болсон нь нууц биш.
Уг мэдээллээс үзвэл, дуучин Э.Оюумаад хайр сэтгэлээ илчлэн захидал илгээж байсан хүмүүсийн дотор олны танил улстөрч, бизнесмэн, дуучин, жүжигчин багтдаг төдийгүй өдгөө 108 захидлаар ном гаргахад ердөө л хоёрхон захиа дутуу байгаа гэжээ. Гэвч энэ бүхнийг үгүйсгэсэн дуучин Э.Оюумаа албан ёсоор тайлбар хийсэн бөгөөд “Надад хайрлаж дурлаж байсан залуусын захидал гэж огт байхгүй, ном гаргах тухай бүр ч бодож байсангүй. Би ийм зүйл хаана ч, хэзээ ч ярьж байгаагүй. Тэгээд бас суварга босгох гэж байгаа юм шиг 108 хайрын захидлаар ном гаргана гэсэн нь намайг доромжилсон хэрэг хэмээн үзэж байна” гэжээ.
Харин баттай эх сурвалжийн өгсөн мэдээллээр бол, дуучин бүсгүй маань нууцхан хайрын эзнээ хэдийнэ олсон төдийгүй хамтдаа амьдарч байгаа юм байна. Түүгээр ч үл барам, ойрын хугацаанд үрийн зулай үнэрлэхээр шийдээд байгаагаа найз нөхөддөө дуулгажээ.
Б.Содон
