Нийслэлийн Засаг дарга бөгөөд Улаанбаатар хотын захирагч Э.Бат-Үүл маш олон ажлыг хийж хэрэгжүүлж яваа гэдэгтэй маргах хүн байхгүй биз. Гэхдээ зарим ажлууд нь шүүмжлэл дагуулж иргэдийн дуу хоолойг сонсохгүй байна. Энэ удаад хоёр л зүйлийг энд онцлоё. Бид өмнө нь энэ сэдвээр хөндөн бичиж байсан удаатай. Дахин хөндөн энэ ажлуудыг зогсоовол дээргүй юу гэдгийг уламжилж байна.

-Хогны уутаа тараахаа зогсооё-

2013 оны хоёрдугаар сарын 8-ны НИТХ-ын тогтоолоор Улаанбаатар хотын хог хаягдлын менежмэнтийг баталсан. Энэ тогтоолын хавсралтад “анхан шатны хог хаягдлыг зориулалтын уутанд хийж хэвшүүлнэ” гээд заачихсан байдаг. Анх хотын захирагч гэр хорооллын иргэдттэй уулзалт хийж  “хогны ууттай болгоё, хогны уут тараах уу” гэхэд бүгдээрээ алга ташин дэмжиж хүлээж авсан хэмээн дурссан удаатай. Мөн  “Азийн цагаан дагина” гэх нэрийг хүртэл иргэдийн санал болгосноор өгсөн аж. 

Энэхүү уутанд байрны өрхүүдээс 2000 төгрөг, гэр хорооллын өрхөөс 2500 төгрөгийг авдаг.  Хогны уут тараах өрхийн тоо нэмэгдсэн учраас төсвийг нь нэмсэн. 2013 оны аравдугаар сараас 2014 оны нэгдүгээр улирлын хугацаанд 317 мянга 131 өрхөд 33,3 сая ширхэг хогны уут үйлдвэрлэхэд 3,1 тэрбум төгрөг зарцуулжээ. Тэгвэл энэ онд 335 мянган өрхөд тараагдаж байгаа бөгөөд 2014 оны дөрөвдүгээр сараас он дуустал буюу есөн сарын хугацаанд тараах уутанд 4,5 тэрбум төгрөг зарцуулахаар төлөвлөсөн. Мөн өрх бүрт зарцуулж байгаа 95 төгрөгийг хуримтлуулбал жилд 5.7 тэрбум төгрөг болно.

Тэгвэл хөрөнгө оруулалтын зардлаар, 120 хүүхдийн таван цэцэрлэг, 600 хүүхдийн хоёр сургууль, 200 ортой дөрвөн эмнэлэг барих боломжтой.

Монголын сургууль, цэцэрлэгийн байр хүрэлцээгүйгээс болж олон хүүхэд гэртээ гал түймрийн осолд орох, бэртэж гэмтэх зэрэг аюултай нөхцөлд үлддэг гэдгийг хүн бүр мэднэ. 2014-2015 оны хичээлийн жилд цэцэрлэгийн насны 256 мянган хүүхэд байгаагаас 202 мянга нь сургуулийн өмнөх боловсролд хамрагдахаар байгаа аж. Үүнээс 156,0 мянга нь төрийн өмчийн цэцэрлэгт, 20,0 мянга нь хувийн өмчийн цэцэрлэгт, 25,8 мянган хүүхэд нь хувилбарт сургалтанд хамрагдах аж. Цэцэрлэгт хамрагдах хүүхдийн тоо өнгөрсөн онтой харьцуулахад найман мянга орчим хүүхдээр нэмэгдсэн байна. Яамнаас гаргасан судалгаагаар 10 хүүхэд тутмын гурав нь цэцэрлэггүй үлдэж байгаа тоо гарчээ. Тодруулбал, энэ жил 54 мянган хүүхэд цэцэрлэгт хамрагдаж чадахгүй юм байна. Түүнчлэн энэ онд улсын төсөв, нийслэл, орон нутгийн төсөв, төслийн санхүүжилтээр 30.586 суудалтай 65 сургууль, 12275 ортой 102 цэцэрлэг, 4800 хүүхдийн хүчин чадалтай 16 бага сургууль-цэцэрлэгийн цогцолбор, 2785 ортой 24 дотуур байр, 12 спорт заал нийт 219 барилгын барилга угсралтын ажил хийгдэж байгаа юм байна. Үүнээс 2014 онд 8648 суудал бүхий 18 сургууль, 5235 ор бүхий 45 цэцэрлэг, 2785 ортой 24 дотуур байр, зургаан спорт заал ашиглалтанд орох юм. 

-Намар хог болдог нэг наст цэцэг-

Нийслэл хотыг өнгөлөг өнгө төрхтэй байлгахыг хүн болгон боддог. Дулаан цаг эхлэхтэй зэрэгцэн хотын гудамж талбай өнгө өнгийн цэцэгсээр гоёдог. Хотын захирагчийн ажлын албанаас нэг наст цэцэгсийг суулгах ажилд буюу ногоон орчныг бүрдүүлэхдээ бизнес хийгээд байна. 

Өнгөрсөн жил нийслэлчүүдийн сэтгэлд нийцсэн нэг наст цэцэг суулгах ажилд 315 сая төгрөгийн зардал гаргаж тарьсан байдаг. Тэгвэл энэ жил эх орны хөрсөнд үрслүүлж, ургуулсан гоёмсог нэг наст цэцгийг Энхтайваны өргөн чөлөө, Ард Аюушийн өргөн чөлөө, Чингисийн өргөн чөлөө, Нийслэл хүрээ өргөн чөлөө зэрэг гол гудамжуудад суулгаж байна. Мөн 22-ын товчоо, Долоон буудал, Үйлдвэрчний эвлэлийн гудамж буюу захын гудамжуудад нэг наст цэцгийг суулгах юм. Энэхүү цэцэгжүүлэлтэд нийслэлийн төсвөөс 500 сая төгрөг зарцуулжээ.

Мэдээжийн хэрэг ногоон байгууламжыг бүрдүүлэх нь сайн хэрэг. Гэхдээ нэлээд хэдэн зуны нүүр үзэх олон наст зүлэг тарьж "зүлэгжүүлье".

Энэхүү нэг наст цэцэг нь намар болонгуут л хагдар гандан унаж салхинд хог болон хийсч эхэлснийг та анзаарсан байх. Өнгөрсөн жилийн 315 сая төгрөг ийм л байдалтайгаар салхинд хийссэн.  Ганцхан зун гангарахгүй "олон" жил гангармаар байна Хотын дарга аа!!!

Нэг настай цэцгэнд зориулсан мөнгөөр мөн л хүүхдийн эмнэлэг барих бололцоотой. Энэ их мөнгийг хэрэгтэй зүйлдээ зарцуулж ирээдүйдээ үлдэцтэй зүйлд зарцуулах нь илүү баймаар.

Х.Даваа

Холбоотой мэдээлэл: Азийн цагаан дагина нэрээрээ дахин нэг дуудагдах юмсан

"Азийн цагаан дагина" уутнаас татгалзаж хүүхдийн цэцэрлэг, эмнэлэг барья!

Ногоон орчноор “бизнес” хийснээр улсын мөнгө салхинд замхарч байна Э.Бат-Үүл ээ!

Эх сурвалж: www.dorgio.mn