Ардчилсан нам бол үндэсний хэмжээний том нам. Олон намын нэгдэл дээр тогтсон түүхэн замналтай. Мөн хамгийн олон фрактай нам гэдгээрээ онцлог. Гэвч сүүлийн жилүүдэд фракиуд нь хоорондоо үзэл санааны гэхээрээ эдийн засаг, санхүүгийн ашиг сонирхолоор хоорондоо тэрсэлдэх хандлагатай болсон нь олны гайхлыг төрүүлж буй. Гишүүд нь ч энэ талаар хатуу шүүмжлэх болжээ. Иймээс УИХ-ын гишүүн Ц.Оюунгэрэл, Л.Болд, Ш.Түвдэндорж, Г.Батхүү,  А.Бакей нар  нам дотроо бас нэгэн фракц байгуулах санаачлага гаргажээ. Тэд энэхүү фракцаа намынхаа анхны нэрээр МоАН хэмээн нэрлэхээр шийдсэн байна. Энэ талаар А.Бакей гишүүн хэлэхдээ “Манайх шиг унаган ардчилалтай улс орон хуруу дарам цөөн. Ардчилалд шилж гэсэн болзлыг хэн ч гаднаас тулгаагүй. Бид энэ ардчиллаа хамгаалах нь чухал боллоо” гэжээ. Мөн Г.Оюунгэрэл “Монголын ардчилал бол үнэдсний үнэт зүйл” гэсэн байна. Тэгвэл Л.Болд гишүүн “Монголын ардчилал бол тусгаар тогтнолын баталгаа юм. Үндэсний аюулгүй байдлын үзэл баримтлалд энэ үзэл санаа гүн тусгагдсан” гэлээ. Тэд ийнхүү үнэт зүйлсийнхээ төлөө нэгдэж  фракцуудаа энэ зүгт чиглүүлэх, цаашдаа фракцуудад намаа хуваагдахаас сэргийлэхийн тулд МоАН хэмээн өөрсдийгөө нэрлэжээ.  Тэднийг дэмжиж буй гишүүд олширч буй аж.

Б.Баяр 

Эх сурвалж: Tumen.mn