Тун удахгүй кино театруудын дэлгэцнээ нээлтээ хийх “ЭТГЭЭД” УСК үзэгчдийн хүлээлтийг үүсгээд байна. Тус киноны өвөрмөц постер, трэйлер зэрэг нь сонирхол татахуйц шинэлэг шийдэл, онцгой дүр төрхөөрөө “этгээд” мэдрэмжийг төрүүлээд байгаа юм. Мөн кинонд ажилласан уран бүтээлч, жүжигчдийн сонголт нь урь өмнө харж байгаагүй дүр төрхийг бий болгож чадсанаараа онцлогтой болжээ.
“ЭТГЭЭД” УСК –ны найруулагчаар ажилласан Б.Баатар нь дэлгэцийн бүтээлд өөрийн гэсэн өнгө, имижийг тодорхойлж, ур чадвараараа танигдсан зураглаач юм. Тэрээр өмнө нь “Сайн, муу, хэрцгий”,” Ар хударга”, “ Зангараг”, “Үргээлэг 2”, “Яллагч”, “Хийморь”, “Сүүн замын сахиул”, “Зориг” уран сайхны кинонуудын ерөнхий зураглаачаар ажиллаж байжээ. Түүний ажилласан “Хийморь” УСК нь хилийн дээс алхаж, Германы Олденбург кино наадмаас “Кино урлагийн амин сүнс” шагнал хүртэн, “San Diego International Film Festival”-ийн “Шилдэг” киногоор шалгарч байсан юм. Мөн Оскарын кино наадмын “Шилдэг гадаад кино” төрөлд нэр дэвших эрхийг авч чадсан билээ. Жинхэнэ кино урлагийн мастерууд “Холливууд бол мөрөөдөл биш” гэж ярьдаг. Үүн шиг Оскар ч мөн адил бидний хувьд зүгээр нэг мөрөөдөл төдий биш юм. Тийм ч учраас Монгол кино Оскарт нэр дэвшихээр чансаатай бүтээгдэж, гадны шүүгчдээс өндөр үнэлгээ авсан нь яах аргагүй “дэвшил” болсоныг илэрхийлнэ. Америкийн зураглаачдын нийгэмлэг (The American Society of Cinematographers)-ийн ерөнхийлөгч Kees Van Oostrum ”Хийморь” УСК-ны ерөнхий зураглаач Б.Баатартай тусгайлан уулзаж, баяр хүргэн, кино зураглаачдын хамгийн том наадамд түүнийг тусгайлан урьж оролцуулж байжээ. Энэхүү үйл явдал нь дэлхийн нэр хүндтэй наадамд Монгол кино зураглаач уригдсан анхны тохиолдол болж байв.
Б.Баатарын хувьд “ЭТГЭЭД” УСК нь түүний анхны бие даан бүтээсэн уран бүтээл юм. Найруулагч энэхүү бүтээлээрээ “хүн өөрөө өөртөө эзэн байж, үзэл бодол, үнэт зүйлээ хамгаалж эс чадвал хэн нэгний олз болон, хохирч үлддэг” гэдэг санааг илэрхийлэхийг зорьжээ. Сэтгэл зүйн триллер төрлийн “ЭТГЭЭД” УСК найруулагчийн шийдэл, зураг авалтын өвөрмөц өнцөг, өнгө, дүрсний төгс чанараараа Монголын уран бүтээлчдийн чадвар, чансааг нэг шатанд ахиулсан бүтээл болж чадсаныг мэрэгжлийнхэн онцолж байна.
