Ням гарагт ОХУ-ын Кремлийн ордны цахим хуудсанд хакерууд халдлаа гэж тус улсын Засгийн газар өчигдөр мэдэгдэв.
Кремлийн ордны хэвлэлийн төлөөлөгч Дмитрий Песков уг халдлагыг ОХУ-ын сөрөг хүчнийхэнтэй холбож үзсэн байна. Учир нь ням гарагт ОХУ-д болсон мужийн сонгуульд Засгийн газартай холбоотой улс төрч нэг мужид л өрсөлдөх эрхтэй гэсэн шийдвэрийг сөрөг хүчнийхэн эсэргүүцжээ.
“Сонгуулийн хорооны цахим хуудас ням гарагийн өглөө халдлагад өртсөн. Ням гарагийн өглөө 5-10 цагийн хооронд ОХУ-ын Ерөнхийлөгчийн болон сонгуулийн хорооны цахим хуудас нэгэн зэрэг халдлагад өртсөн нь их сонирхол татаж байна гэж тэрбээр сэтгүүлчдэд мэдэгдсэн байна.
Мөн тэрбээр, хамгаалалтын систем ажиллаж байсан ч гэсэн халдлага үүнээс илүү хүчтэй байсан. Халдлагыг хэн үйлдсэн нь тодорхойгүй байна гэж мэдэгдэв.
ОХУ-д хакерын гэмт хэрэг их гардаг бөгөөд АНУ тогтмол тус улс болон БНХАУ-ыг хакерын халдлагад буруутгадаг.
Украин, Сирийн хямрал, хүний эрх болон бусад асуудалтай холбоотой Өрнөдийн орнууд болон ОХУ хоорондын харилцаа хүндхэн байгаа энэ үед Москвагийн суртал ухуулгыг тараахад туслах болон АНУ-ын Засгийн газрын компьютерт халдах зорилгоор ОХУ-ын Засгийн газар хакеруудад дэмжлэг үзүүлдэг гэж шинжээчид үзэж байна.
Д.Нямтулга
