Үндэсний статистикийн хороо үнэн, худал хоёроор “хувин дүүргэж” суудаг бололтой. Өнгөрсөн онд УИХ-ын чуулганы хуралдаан дээр нэгэн гишүүн “Статистик тоонууд чинь үнэн юм уу” хэмээн уцаарлаж байсан. Гэхдээ зарим статистик судалгаа, тооцоо нь багцаатай гардаг аж. Тус хорооны тооцоолсноор өнөөдөр манай улсын гурван хүн тутмын нэг нь ядуу гэсэн ангилалд багтаж байгаа нь үнэний ортой болов уу. Харин ҮСХ-ноос  Монголд тэргүүлэх хэмжээний  тэрбумтан хэд байгаа, тэдгээр нь хэн хэн гэгч эрхмүүд болохыг  нийтэд мэдээлэхгүй байгаа юм. Энэ талаар лавлахад “Хувь хүний нууц” гэсэн үгээр ам таглах болжээ. Ухаандаа ядуусыг судалж, олон нийтэд тоо толгойгоор нь мэдээлж болдог, баячуудын талаар ам нээж болдоггүй гажиг “зарчим” тус хороонд үйлчилж буй ажээ. Өнгөрсөн онд зарим хэвлэл мэдээллийн хэрэгслээр Азийн тэрбумтангуудын жагсаалтанд Монголын 35 хүн багтсан тухай  зарлаж байлаа. Тэдгээрийн дотор УИХ-ын гишүүн асан Ц.Шинэбаярын нэр явж байв. Түүнээс энэ талаар асуухад “Би тийм баян хүн биш шүү дээ. Зориуд улс төрийн зорилгоор даажигнаж байгаа биз. Худал мэдээлэл байна лээ” гэж байв. Тэгвэл бид иймэрхүү “нууц”-ын талаар цаашдаа худал цуураад л, ҮСХ нь нууцалж дараад, иргэдээ ялгаварлаад л байх уу.   

Б.Баяр   

Эх сурвалж: Tumen.mn