АТГ-ын дэд дарга асан Б.Хурцыг Тагнуулын ерөнхий газрын даргаар томилсоныг зарим мэдээллийн хэрэгслээр “Энэ бол хууль зөрчсөн шийдвэр” гэж байлаа. Учир нь АТГ-ын дэд даргын томилгоог УИХ-аас шийддэг. Тиймээс ажлаас чөлөөлөхийг нь ч мөн адил гэж үзсэн хэрэг.  Тэгвэл  өчигдөр УИХ-ын  Хууль зүйн байнгын хорооны хуралдаанаар түүнийг АТГ-ын дэд даргын албан тушаалаас чөлөөлжээ. Б.Хурц шинэ ажлаа хүлээн авсны дараахан харин Төрийн тусгай хамгаалалтын газрын дарга Ж.Наранбаатарыг ажлаас халах шийдвэр гаргасан байна. Ийнхүү яаравчлан хүнээ халж солихоос ажлаа эхэлсэн нь бас учиртай аж. Юу гэвэл, Ерөнхий сайд асан Н.Алтанухуяг дөрвөн дугуйт “ATV” мотоциклоос унаж бэртэхэд хамгаалалтын албаныхан хаана юу хийж байсан нь тодорхойгүй байсантай холбоотой юм байна. Төрийн тусгай хамгаалалтанд хэвээр байсан Н.Алтанхуягийг  хамгаалалтын албаныхан хянаж, шаардлагатай тохиолдолд болчимгүй үйлдлийг нь зогсоох ёстой байжээ. Ж.Наранбаатар өмнө нь АТГ-ын Тамгын хэлтсийн даргаар ажиллаж байгаад өнгөрсөн оны 9 дүгээр сард Төрийн тусгай хамгаалалтын газрын даргаар томилогдсон байлаа. Тэрбээр нэг жил хоёр сар гаруй хугацаанд дарга хийгээд халагдав.  

Tumen.mn

Б.Баяр