-“Шударга ёс” эвсэл задрах уу-

Сүүлийн үед улс төрд өрнөж байгаа үйл явц их л ээдрээтэй болж буй. Сонгуулийн тухай хуульд нэмэлт өөрчлөлт оруулахаар болсон ч улс төрийн хүчнүүд тогтолцоон дээрээ тохирч чадаагүй л байна. Мөн 17 гишүүн Ерөнхий сайдыг огцруулах бичигт гарын үсэг зурчихлаа. Ингэснээр Ч.Сайханбилэгийн засаг их л эвгүй байдал орлоо. Оюутолгойн далд уурхайн төлөвлөгөөг гадаадад очиж үзэглэсэн, Монголын газар нутаг, баялгийг барьцаалан 15 банкинд барьцаалан зээл олгох боломжийг олгосон. Өмнөх засгийн үед Оюутолгой төсөлд хийсэн шалгалтаар илрүүлсэн 2.1 тэрбум төгрөгийн зөрчлийг хүчингүй болгосон зэрэг үндэслэлээр Ч.Сайханбилэгт хариуцлага тооцох асуудал ширүүсч эхэллээ. Нөгөөтэйгүүр хоёр гишүүн л нэмээд гарын үсэг зурчихвал УИХ-аар Ерөнхий сайдыг огцруулах эсэх асуудлыг хэлэлцэх юм. Харин ийм үйл явдал өрнөж байгаа үед МАХН-ынхан араа бодож эхэлсэн байна. Тэд энэ асуудалд ямар байр суурьтай байх, “Шударга ёс” эвсэл задрах уу, Ц.Даваасүрэн, С.Ганбаатар нарын Ерөнхий сайдыг огцруулах бичгийг дэмжих эсэх гээд бодолцох, боловсруулах зүйл байгаа нь мэдээж. Тиймдээ ч дэд дарга Д.Тэрбишдагва нь Солонгосыг зорьж, МАХН-ын дарга Н.Энхбаяртай уулзаж байгаа аж.

Хэдийгээр Д.Тэрбишдагва, Н.Энхбаяр хоёрын харилцаа сүүлийн үед тааруухан байсан гэх. Цагаан сарын баяраар Н.Энхбаяр БНСУ-аас ирээд намынхантайгаа золголт хийж, зул өргөх ёслолд оролцоход Д.Тэрбишдагвын бараа харагдахгүй байсан гэдэг. Гэвч тэдний харилцаанд цав суугаагүй бололтой. Зургаадугаар сарын 1-нд болдог Н.Энхбаярын төрсөн өдөрт Д.Тэрбишдагва биечлэн баяр хүргэхээр очсоноос гадна санал солилцохоор хилийн чанадыг зорьсон үйл явдал харуулж байна. Тэд улс төрд өрнөж буй дээрх үйл явдалд ямар бодлого гаргах гээд намын дэд дарга Д.Тэрбишдагвад дайж явуулах захиас занагаа боловсруулж буй нь тодорхой биз. Энэ үеэд улс төр судлаачид Д.Тэрбишдагва Н.Энхбаяртай зөвлөлдөх, чиг авахаар Сөүлийг зорьсон, тэндээс гарах шийдвэр Шийдлийн Засгийн газар ганхах уу, үгүй юү гэдгийг шийдэхэд чухал нөлөөтэй гэж дүгнэж байна.

Дубай хотноо зурагдсан Оюутолгойн далд уурхайн санхүүжилтийн төлөвлөгөөний талаар гурав хоногийн өмнө Ерөнхий сайдыг “байцаасан”. УИХ-ын Аюулгүй байдал, гадаад бодлогын байнгын хороогоор Оюутолгойн асуудлыг хэлэлцэх үед Н.Алтанхуягийн тэргүүлсэн засгийн үед шалгалт хийгээд 2.1 тэрбум ам.долларын зардлын хэтрэлт гарсныг тогтоосон. Үүнийг зөрчил биш гэж тооцон “Рио Тинто”-д бууж өгч, хөрөнгө оруулалтын зардлыг огцом өсгөснийг хүлээн зөвшөөрсөнд ажлын хэсэгт орж ажиллаж байсан УИХ-ын гишүүн Д.Тэрбишдагва, Ч.Улаан, Д.Ганхуяг нар шүүмжлэлтэй хандсан. УИХ дахь МАХН-МҮАН-ын “Шударга ёс” эвслийн бүлгээр Оюутолгойн далд төлөвлөгөөг батласан асуудлыг ярилцах үед УИХ-ын гишүүн Д.Тэрбишдагва “Засгийн газарт байх эсэхээ шийднэ, Монголын эрх ашиг хөндөгдөх ёсгүй” гэх хатуухан үгийг Ерөнхий сайдад хаяглаж дайсан гэх мэдээлэл ч хэвлэлээр гарч байна. Тэгэхээр Д.Тэрбишдагва улс төрийн шийдлийн хувьд ямар тохироотой ирэх нь анхаарал татлаа.
А.БИЛГҮҮН

Эх сурвалж: www.newscom.mn