Үндэсний агаарын тээвэрлэгч “МИАТ” компаний тухай нэгэн таагүй мэдээлэл зорчигчдоо бухимдуулж эхлэв. Тодруулбал, тус компани өнгөрсөн бямба гаригт 09:10 цагийн үед “Улаанбаатар-Москва-Берлин” чиглэлд хөөрсөн ч чиглэлээ өөрчилж Новосибирск хотод газардсан гэнэ. Ингэхдээ зорчигчдоо үл хүндэтгэж тус газардсан хотод хоёр цаг гаран сандалгүй зогсоосон аж. Буух ёсгүй газраа газардсан зорчигчид удаан хүлээсний эцэст нислэгээ үргэлжлүүлж Берлинд 13:25 цагт буух байсан ч 17:20 цагт газарджээ. Үүний улмаас зорчигчид цаг хугацаа алдаж Берлингээс цааш дамжин нисэх иргэд болоод автобусаар өөр хот руу явах байсан иргэдэд багагүй хүндрэл учирсан байна. Энэхүү нислэгийг дур мэдэн саатуулж зорчигчдод хүндрэл учруулсан хэргийн эзэнг МИАТ-ын албан тушаалтнууд ийн тайлбарласан байна. Тэрээр “Зам тээврийн сайд М.Зоригт ажлын гурван цагт багтааж хэн гэгч албан тушаалтнаас болж онгоц нислэгийн чиглэлээ өөрчилсөнг олж тогтоох үүрэг өгсөн. Хэн гэдгийг тогтоосон даруйдаа зарлана гэсэн. Удахгүй тодорхой болж албан ёсоор мэдээлэх болно” гэв. Тэгвэл өчигдөр орой Зам тээврийн яамнаас онгоцны чиглэлийг өөрчилсөн эрхэмийг МАН-аас НИТХ-д сонгогдсон Б.Энх-Амгалан байсан тухай мэдэгдэв.
Тус Зам тээврийн яамны мэдэгдэлд: “МИАТ-ийн онгоцыг Новосибирскт 3 цаг саатуулсан хэргийн эзэн нь “Мишээл” группийн захирал, иргэдийн хурлын төлөөлөгч Энх-Амгалан юм байна. Энэ захирал ажилтнуудтайгаа Ново-д буухын тулд ийм бүдүүн зүрх гаргаж. Онгоцонд явсан зорчигчдын хохирлыг тооцоолох болон бас бус шалгах ажлууд гарсан. Маргааш /өнөөдөр/ ИНЕГ-аас эцсийн байдлаар мэдээлэл авна” гэж мэдэгдсэн юм. Тун удахгүй энэ тухай дэлгэрэнгүйг тус яамнаас мэдээллэх болно.
Эх сурвалж: Шуурхай.мн
