Эрх чөлөөг хэрэгжүүлэгч намаас өчигдөр Чингисийн талбайд Иргэдийн зээлд өршөөл үзүүлэх тухай хуулийн төслийн талаар санал асуулга явуулжээ. Дээрх намын дарга Ш.Төмөрсүх “УИХ-аас Эдийн засгийн ил тод байдлыг дэмжих тухай хуулийг баталсан. Тус хуулийн хүрээнд ойролцоогоор дөрвөн их наяд төгрөгийн хэргийг өршөөнө. Өнөөдөр Монгол Улсын иргэд арилжааны банкуудаас нийт 1.5 их наяд төгрөгийн зээл авсан байна” гэв.
Мөн тэрбээр үргэлжлүүлэн “Хөрөнгөө нууж, татвараас зайлсхийсэн гэмт хэрэгтнүүдийг өршөөж байна. Тиймээс улс төрчдийн буруу бодлогоос болж амьдрал нь доройтож буй иргэдийн зээлийг ч мөн өршөөх хэрэгтэй. Монгол Улсад өр, зээлгүй хүн гэж бараг алга. Бүгд л цалингийн болон үл хөдлөх хөрөнгө, малаа барьцаалсан зээл авч байна. Бидний саналыг иргэдийн олонхи дэмжсэн тохиолдолд Иргэдийн зээлд өршөөл үзүүлэх тухай хуулийн төслийг боловсруулан УИХ-д өргөн барина” гэлээ.
Эх сурвалж www.wikimon.mn
