Албан тушаалын төлөөх тулаан төрийн ордон, яам, тамгийн газруудад үргэлжилж байна. Сүүлийн хоёр өдрийн турш энэ тулаанд АН, МАН хоёр ана мана үзэлцлээ. Тэд зарим яамны Төрийн нарийн бичгийн даргыг томилоход үг хэлээ ойлголцохгүй зөрөлдөж байна. Үүний улмаас өчигдөр УИХ дахь МАН-ын бүлэг чуулганы хуралдаанд суухгүй гэж гүрийв. Тус намынхан Гадаад хэргийн яамны Төрийн нарийн бичгийн даргаар Б.Болдбаатар, БСШУЯ-нд Р.Эрдэнэбүрэн, Эрчим хүчний яаманд Д.Дэлгэрцогтыг томиолсонд бухимдсан бололтой. Мөн өөрсдийнх нь толгойлж буй Барилга хот байгуулалтын яамны Төрийн нарийн бичгийн даргаар АН-ынхан Р.Эрдэнэбүрэнгээ улираан томилсон нь бас гал дээр тос нэмэх шиг боллоо. Уг нь тухайн салбарын сайд нь энэ албан тушаалд томилох хүнээ санал болгох учиртай. Төрийн албаны зөвлөл ч үүнд анхаарал хандуулж сонгон шалгаруулалтаа хийх нь зөв байсан болов уу. Иймэрхүү маргаанаас болоод МАН-ынхан бүлгийн хурал зарлан хуралдуулахдаа Ерөнхий сайд Ч.Сайханбилэгийг дуудан асуулт тавихыг хүсчээ. Энэ үеэр Ц.Нямдорж гишүүний “онгод” орж ёстой самнаж өгөх шиг болов. Тэрбээр, “Би Ч.Сайханбилэг, С.Баярцогт та хоёрыг төрийн ажлыг ингэж завхруулна гэж санаагүй. Та хоёр төрийн зүтгэлтэн болоогүй байна. Дэд сайдуудыг томилохдоо АТГ-аас мэдүүлэг авсангүй. Хууль зүйн сайд нь тодорхой болоогүй байхад цагдаагийн даргыг томилсон нь буруу. Цаашид ингээд яваад байх юм уу, Ч.Сайханбилэг ээ” гээд үгэн сумаар шүршиж байв. Харин Ч.Сайханбилэг томилгооны талаар эргэж ярилцах хэрэгтэй юм байна” гэсээр нэлээд бухимдуухан гарч явжээ.
Б.Баяр
Эх сурвалж: Tumen.mn
