Ерөнхийлөгч У.Хүрэлсүх өнгөрөгч 2020 оны арванхоёрдугаар сарын 13-ны өдөр Ерөнхий сайдаар ажиллаж байхдаа нэгэн түүхэн шийдвэр гаргасан нь айл өрх, аж ахуйн нэгж бүрийн ус, цахилагаан, дулаан, хогны төлбөрийг өнгөрөгч долоодугаар сарын 1-ний өдрийг хүртэл тус тус тэглэж байв. Мөн иргэдийн үндсэн хэрэглээ болох шахмал түлшний өртгийг 75 хувиар бууруулж байсан юм. Тэгвэл цар тахлын нөхцөл байдал, иргэд, ААН-ын аргагүй байдлыг харгалзан үзэж энэ хугацааг 2022 оны нэгдүгээр сарын 1-нийг хүртэл сунгаж тэглэсэн учраас энэ шийдвэр хүчингүй болж, айл өрх бүр төлөх ёстой мөнгөө төлөх учиртай.

Цар тахлын хүнд хэцүү үед оновчтой зөв шийдвэр гаргаж, иргэд аж ахуйн нуруун дээрээс нэгэн том ачааг бүтэн жил хөнгөлж өгсөн өдгөөгийн Ерөнхийлөгч У.Хүрэлсүхэд өнөөдрийг хүртэл иргэд олон нийт талархалтай ханддаг. Харин төрийн халааснаас гарах энэ их мөнгийг чухам ямар замаар төлөх вэ гэдэг асуудал зүй ёсоор урган гарч байсныг ч уншигч та санаж байгаа байх.

Тэгвэл тухайн үед У.Хүрэлсүх уг төлбөрийг тэглэж, санхүүд зарцуулагдах мөнгө болох 650 тэрбум төгрөгийг уулын баяжуулах “Эрдэнэт” үйлдвэр хариуцна хэмээн мэдэгдсэн. Энэ дагуу “Эрдэнэт” үйлдвэр өнөөдрийг хүртэл ард иргэд, аж ахунй нэгжүүдийнхээ өмнөөс ус цахилгаан, дулаан, хогны мөнгийг төлж ирсэн гэдгийг дуулгах учиртай. Дээр нь төлбөрийн хугацааг энэ оныг дуустал сунгасан учраас нийтдээ 1.2 их наядыг тус үйлдвэр төлж барагдуулахаар болж байв.

Тодотговол, “Эрдэнэт” үйлдвэр нийт 123 мянга 800 ААН, 900 мянга гаруй өрхийн ус, цахилгаан, дулаан, хогны төлбөрийг тэглэхэд 1.2 их наяд орчим төгрөгийг зарцуулжээ. Цар тахлын нөхцөл байдалд иргэдийн эдийн засагт үүсэх хүндрэлийг тооцож, Засгийн газраас 2021 он дуустал тодорхой хөнгөлөлтийг иргэд, аж ахуйн нэгжүүдэд үзүүлж эхэлснийг ийнхүү “Эрдэнэт” үйлдвэр амжилттай гүйцэтгэжээ.

Д.Нэргүй

Түмэн.мн